Уһук Хоту Усуйаанаҕа
Аан дойду үөрүүнэн долгуйар,
Ол тахсар саҥа күн уотуттан,
Баттаммыт дьон-аймах уһуктар.
Сир киинэ Москва куоракка
Кыайыыбыт салюта ньиргийэр.
Сибэкки букета халлааҥҥа
Айхаллаан ыһылла үрэллэр.
Уруйдан, тапталлаах Дойдубут!
Аатырда эн аатыҥ аар-саарга,
Бигэтик эрэнэр буоларбыт
Бу кэлбит саргылаах Кыайыыга!
Муустаах муораны тайаан сытар кырдьаҕас Усуйаана нэһилиэгэр Улуу Кыайыы сылыгар аналлаах араас элбэх тэрээһиннэр буоллулар, буолан да аастылар, ол курдук сибиэһэй салгыҥҥа флешмоб уонна физкультура учуутала Сахаяна Репина көмөтүнэн, эти-сиини чэбдигирдэр араас хамсаныылаах зарядканы оҥордубут, ыам ыйын 8-с к. кулууп дьиэтигэр оскуола оҕолоро Кыайыы 80 сылыгар аналлаах, быыһыгар музыкальнай нүөмэрдэрдээх театрализованнай көрдөрүүнү көрдүбүт.
Өрөгөйдөөх Улуу Кыайыы күнүгэр ытыктыыр, сүгүрүйэр ветераннарбытыгар махтанан, “Өспөт үйэлээх полк” хаамыыта буолла, нэһилиэк дьоно бары тахсан эһээлэрбит, эбээлэрбит хаартыскаларын тутан хаамтыбыт, ол кэннэ кулууп дьиэтин таһыгар турар красноармеец Александр Романов пааматынньыгар сибэкки дьөрбөтө уурулунна, ону тэҥэ «Полевая кухня» диэн гречкалаах хара килиэп уурулунна, тэрилтэ салайааччылара эҕэрдэ тылларын эттилэр.
Ол кэннэ «Кэскил» култуура дьиэтигэр «Ветераҥҥа махтал» диэн банкет буолла, маны иилээн-саҕалаан ыытта үлэ ветерана Евдокия Ивановна Болтунова, ырыа-тойук ньиргийдэ, үнкүү-битии дэлэйдэ.
Олохтоох дьаһалта баһылыга София Андреевна Олесова ветераннарга сэрии сылын оҕолоругар Ил Дархан аатыттан бэлэх туттартаата, дьэ ол кэннэ Евдокия Болтунова хоһуйбут тылыгар, күн үҥкүүтүн тоҥолохтон тутуһан «Кыайыы Оһуохайа» ньиргийдэ. Оһуохайы эттилэр олохтоох библиотекарь Туйаара Николаевна Колодинская, нэһилиэк баһылыга София Андреевна Олесова уонна Семён Васильевич Горохов аатын сүгэр оскуола учуутала Ирина Юрьевна Слепцова. Ити курдук оһуохайынан банкет түмүктэннэ.
Харах уулаах Кыайыы күнүгэр «Кыайыы Салюта» диэн ааттаах эҕэрдэ кэнсиэр буолла , кэнсиэркэ көхтөөх кыттыыны ыллылар олохтоох талааннаах эдэр, орто, саастаах көлүөнэ дьоннорбут, кэнсиэри ыыттылар оскуола 11 кылааһын выпускниктара Саюри Дохунаева уонна Евдоника Горохова.
Бу курдук Кыайыы күнүгэр аналлаах тэрээһиннэр биһиги нэһилиэкпитигэр олус үчүгэйдик, үрдүк таһымҥа аастылар. Күндү биир дойдулаахтарбытын, ветераннарбытын Улуу Кыайыы 80 сылынан итиитик-истинник эҕэрдэлиибит! Ытыктыыр бэтэрээн дьоннорбут хас биирдии күннэрэ сүрэхпит сылааһынан, уҕараабат кыһамньыбытынан туоллун!
“Кэскил” култуура дьиэтин үлэһиттэрин аатыттарыттан уонна тус бэйэм ааппыттан улахан махталбытын тиэрдэбит олохтоох дьаһалта үлэһиттэригэр, оскуола коллективыгар, «Кустук» оҕо саадын коллективыгар, «Эйгэ» дьахталлар түмсүүтүгэр, нэһилиэк депутаттарыгар, эдэр ыччаттарга, оҕолорго, нэһилиэк дьонугар-сэргэтигэр! Баҕарабыт эһиэхэ сир үрдүгэр баар бары үтүөнү-кэрэни, уйгуну-быйаҥы! Куруук ситиһии сиэттистин, дьол-саргы аргыстастын!
Матрёна Попова, «Кэскил” култуура дьиэтин директора