Ытыктабыллаах Дьүкээгир оскуолатын учууталларын, иитээччилэрин уонна оҕо иитиитин эйгэтигэр бииргэ үлэлиир коллегарбын Учуутал күнүнэн эҕэрдэлиибин!
Хас биирдии оҕо дьылҕатыгар, кини киһи быһыытынан чочуллуутугар, төрөппүттэри сэргэ, учуутал сабыдыала улахан. Учуутал оҕоҕо билиини-көрүүнү тиэрдэр, иҥэрэр, айар-тутар дьоҕурун сайыннарар, ону тэҥэ, дьоһун, сиэрдээх киһи буола улаатарыгар кыһаллар.
Биһиги оскуолаларбытыгар үөрэтии таһымыттан, хаачыстыбатыттан оҕолор инники дьылҕалара, идэни сөптөөхтүк талыылара, кэлин идэни баһылаан, үлэһит буолан, уопсастыбаҕа туһалаах, бигэ тирэхтээх дьон буолаллара уонна бүттүүн дойдубут сайдыыта быһаччы тутулуктаахтар.
Баҕарабын эһиэхэ эппиэтинэстээх уонна кэскили түстүүр үлэҕитигэр ситиһиилэри, махталлаах үөрэнээччилэри, кытаанах доруобуйаны уонна дьиэ кэргэҥҥитигэр дьолу, уйгулаах олоҕу!
Маны таһынан Дьүкээгир оскуолатын аттестатын ылан кэккэ сылларга үөрэх араас эйгэтин бүтэрбиттэри эҕэрдэлиибин. Билэргит курдук, 2013 сылтан Дьүкээгир оскуолата 9 кылаастаах оскуола буолбута. Киэн тутта ааттыыбын бастакы выпускниктар ааттарын — Айталина Устинова, Ангелина Томская, Екатерина Реброва, Таня Горохова, Камила Реброва. Кинилэр орто анал үөрэҕи бүтэрэн бэйэбитин кытта уонна атын сиргэ ситиһиилээхтик үлэлии сылдьаллар.
Кэлин сыллар выпускниктарыттан Кэрэчээнэ Горохова учуутал идэтин талан атын сиргэ ситиhии үктэллээх үлэлии сылдьар. Үрдүк үөрэххэ быйыл кэтэхтэн киирдэ. Ян Филиппов, Эдуард Слепцов, Александра Томская орто үөрэх дипломун ситиһиилээхтик туттаран ыллылар.
Билигин выпускниктарбыт араас үөрэх кыһатыгар ситиһиилээхтик үөрэнэ сылдьаллар: учуутал идэтин үөрэҕэр Аврора Филиппова – 2-с курс, Жанна Петрова – 2-с курска туйгуннук үөрэнэ сылдьаллар, экономика салаатыгар Уля Горохова 2-с курс, Снежана Горохова 4-с курс, Дарина Горохова 4-с курс эмиэ ситиһиилээхтик үөрэнэ сылдьаллар. МЧС уонна юридическай салааҕа Эрчим Колесов 4-с курс, Виталий Филиппов 3-с курс, индустрия эйгэтигэр Вася Томскай 3-с курс, Гаврил Слепцов, Иван Слепцов быйыл үөрэххэ киирэн эмиэ ситиһиилээхтик үөрэнэ сылдьалларынан киэн туттабын. Бэйэбит кэккэбитигэр орто үөрэҕи бүтэрэн кэлэн 6-с сылын үлэлии сылдьар үөрэппит оҕобут Айталина Устинованы бэлиэтиэхпин баҕарабын, кэтэхтэн үөрэнэн 2027 сылга үрдүк үөрэх английскай тылы үөрэтэр идэ дипломун ылаары сылдьар.
Бу ситиhии барыта үлэ түмүгэ, көрдөрүүтэ буолар. Саҥа педагогическай үөрэҕи бүтэрэн, диплом тутан Дьүкээгир оскуолатыгар ананан кэлэн күн бүгүҥҥэ диэри үлэлии сылдьар учууталлар Екатерина Брагина, Ия Болтунова, Виктория Слепцова номнуо 10-20-тэн тахса сыл буолбут.
Дьүкээгир оскуолатыгар уонна уhуйааныгар үлэлии сылдьан элбэх үлэһит орто анал үөрэх дипломун ыллылар. Ол курдук педагогическай орто үөрэҕи баһылаатылар – Александра Филиппова, Софья Протодьяконова, Мария Горохова, Гульнара Горохова, Геннадий Горохов – сорохтор киин сирдэргэ таhаарыылаахтык үлэлии сылдьаллар.
Бэйэбит оскуолабыт выпускниктара, кыра кылааска үөрэммит оҕолор Софья Суздалова, Сидор Суздалов, Вячеслав Филиппов, Розанна Гребенщикова, Валентин Томскай, Анжелика Томская, Лаура Томская төрөөбүт оскуолаларыгар күн бүгүн үлэлииллэр-хамсыыллар.
Оскуолабытыгар атын сиртэн кэлэн үлэлээбит, үтүө өйдөбүл хаалларбыт учууталларынан буолаллар: Раиса Борисова, Любовь Борисова, Оксана Довлетова, Зоя Томская, Туяра Корнилова, Анна Никулина, Виктория Владимирова, Сардана Горохова, Виктория Осипова, Надежда Протодьяконова, Николай Саввин, Антон Ширяев, Марианна Петрова, Күннэй Слепцова уонна да атыттар. Мин иннибинэ үлэлээбиттэр Яков, Алена Сивцевтар суолу-ииhи хаалларбыт педагогтар буолаллар.
Оҕо иитиитигэр уонна үөрэтиитигэр тапталгыт уостубатын, саҥаттан саҥа саҕахтары арыйан ситиhиилээхтик үлэлээҥ!
Светлана Пестерева, СР үөрэҕириитин туйгуна,
Дьүкээгир ситэтэ суох орто оскуолатын директора