Усуйаана нэһилиэгин библиотекара Туйара Колодинская нэһилиэккэ ааспыт тэрээһин туһунан хаһыакка анаан кэпсээтэ.
«Соторутааҕыта Усуйаана нэһилиэгэр биир дойдулаахпыт, биллиилээх суруйааччы, кыраайы үөрэтээччи, Усуйаана улууһун бочуоттаах олохтооҕо, алмаас промышленноһын бэтэрээнэ, Саха Өрөспүүбүлүкэтин култууратын үтүөлээх үлэһитэ, «Гражданскай килбиэн» бэлиэ хаһаайына, Арассыыйа суруналыыстарын уонна Саха Өрөспүүбүлүкэтин суруйааччыларын сойуустарын чилиэнэ, Российскай Федерация географическай обществотын Саха сиринээҕи салаатын чилиэнэ Николай Иннокентьевич Попов — Күндүлүн кэлэн «Атыыһыт аҕа ууһун удьуора” диэн саҥа кинигэтин презентациялаата. Тэрээһин олус үчүгэй, истиҥ көрсүһүү, иһирэх сэhэргэhии быһыытынан ааста. Ааптар саҥа кинигэтигэр удьуора кимтэн кииннээҕин, хантан хааннааҕын үс сыл устата чинчийэн, хомуйан үөрэппит матырыйаалларын кинигэ гынан сурукка хаалларбыта, бэчээккэ таһаарбыта аймахтарын сөхтөрдө уонна үөртэ.
Бырааттара Николай Инн-ч, Юрий Инн-вич, Аркадий Инн-ч. Слепцовтар
Көрсүһүүгэ кэлбит төрөөбүт нэһилиэгин дьоно-сэргэтэ Николай Иннокентьевич Попов- Күндүлүҥҥэ маннык дириҥ ис хоһоонноох кинигэтин, өбүгэлэрин туһунан билиигэ киэҥ укулаатын иһин махталларын уонна сүгүрүйүүлэрин биллэрдилэр, маннык сэдэх төрүччү Усуйаана нэһилиэгэр баар буолбута олус кэрэхсэбиллээх диэн эттилэр. Киниэхэ чэгиэн-чэбдик доруобуйаны, айар үлэтигэр ситиһиилэри баҕардылар.
Бүгүн Усуйаана нэһилиэгэр бу кинигэҕэ ахтыллыбыт бары киэҥ уруулар удьуордара төрөөбүт сирдэригэр олороллор, үлэлииллэр-хамсыыллар. Бу кинигэ кинилэргэ өбүгэлэрин умнуллубат ааттарын эргиттэ. Төрөөбүт Усуйааналарын киэҥ аймахтара өссө тэнийэн, кэҥээн, удьуордарын ситимэ мөлтөөбөккө салгыы уста турдун!”
Бэлэмнээтэ Надежда Петрова