Балаҕан ыйын 27 күнүгэр икки бүк улахан суолталаах дьоһун дьоро күн тохсойдо. Ол курдук Саха Өрөспүүбүлүкэтин судаарыстыбаннаһын күнүгэр сөп түбэһиннэрэн «Тумат нэһилиэгэ» тыа сирин түөлбэтин баһылыга Василий Алексеевич Лебедев үрдүк дуоһунаһыгар киирэр үөрүүлээх сиэрэ-туома буолан ааста.
Үөрүүлээх тэрээһиҥҥэ кыттыыны ыллылар: нэһилиэк мунньаҕын депутаттара, учаастактааҕы быыбардыыр хамыыһыйа чилиэннэрэ, тэрилтэ салайааччылара уонна олохтоохтор.
Балаҕан ыйын 14 күнүгэр Тумат нэһилиэгэ тыа сирин баһылыгын быыбара буолан ааста. Быыбар түмүгүн билиһиннэрэргэ 625 № — дээх учаастактааҕы быыбар хамыыһыйатын бэрэссэдээтэлэ Мария Владимировна Слепцова быыбар хаамыытын этэн туран иккис төгүлүн талыллыбыт баһылыкка удостоверение туттарда. Ол кэннэ Василий Лебедев нэһилиэгин дьонун иннигэр Тумат нэһилиэгин баһылыгын солотугар киирии андаҕарын эттэ.
Сайдыы суолун тутуһа, сарсыҥҥы күнүн түстэһэ, олохпут оҥкулун оҥорсо, сүбэни-соргуну түмэ бүгүҥҥү үөрүүлээх күҥҥэ эҕэрдэ, алгыс тыллар этилиннилэр: Усуйаана улууһун Муниципальнай оройуонун Баһылыга Валерий Юрьевич Сидорин эҕэрдэтэ, нэһилиэк депутаттарын сэбиэтин бэрэссэдээтэлин солбуйааччыта Елизавета Алексеевна Горохова, Тумат национальнай нэһилиэгин бочуоттаах олохтооҕо Ольга Спиридоновна Протодьяконова.
Үтүө мааны Тумат нэһилиэгин дьоно-сэргэтэ, дьоһуннаах олох тускулун туһаайан, кэлэр кэм кэтит кэскилин түстээн, биир санаанан салайтаран баһылык Василий Лебедев тула биир сомоҕо буола түмүстүлэр. Үөрүүлээх быһыыга-майгыга баһылык наҕараадалары туттартаата.
Төрүт сирбит Тумаппыт сайдарын туһугар туруулаһан үлэлииргэ иккис төгүлүн талыллыбыт баһылыкка Василий Лебедевка, нэһилиэк депутаттарыгар ситиһиилээх үлэни баҕарабыт.
Тумат нэһилиэгин үтүө аата өрүү үрдүү турдун, нэһилиэкпит үлэһит, түмсүүлээх дьоно алгыһынан арыалланан үрдүктэн үрдүккэ тахсан иһиэхпит.
Мичил Томскай