Алтынньы 20 күнэ – байыаннай эпэрээссийэлэри сибээһинэн хааччыйыыга уонна сүрүннээһиҥҥэ үлэлиир исписсэлиистэргэ ананар. Бу күн 1919 сыллаахха Кыһыл Аармыйаҕа сибээс тэрилтэтэ арыллыбыта.
Бу дьоһун күнү бэлиэтиир тэрээһиҥҥэ биһиэхэ, Туматтааҕы “Түмсүү” культура дьиэтигэр Сэбиэскэй Союз Сэбилэниилээх күүстэрин салгынтан көмүскэнии Кыһыл аармыйа кэккэтигэр радиотехническай байыаннай чааска сулууспалаабыт, Саха сирин тыатын хаһаайыстыбатын туйгуна – Маркел Иванович Слепцов ыалдьыттаата.
Кини сулууспалаабыт кэмнэрин ахтан-санаан кэпсээтэ, иһитиннэрдэ. Итиэннэ кыттыыны ыллылар оскуола үөрэнээччилэрэ. Тэрээһиҥҥэ оҕолор байыаннай-патриотическай тиэмэҕэ уруһуйдарын уонна пластилинынан илиинэн оҥоһуктарын аҕалан көрдөрүүгэ туруордулар. Кыттааччыларга Туоһу суруктар туттарылыннылар, өйдөбүнньүк хаартыскаҕа түһүү буолла.
Байыаннай сибээс күнүгэр сөп түбэһиннэрэн сырдатыы презентация уонна байыаннай тиэмэҕэ тургутуктар ыытылыннылар. Көрөөччүлэр, истээччилэр элбэҕи, сонуну билэн тарҕастылар.
Мичил Томскай