Бэс ыйын 12 күнүгэр дойдубут үрдүнэн Россия күнэ бэлиэтэнэр. Бу күн куруук буоларын курдук Тумат нэһилиэгин олохтоохторо самолет түһэр былаһааккатыгар үөрэ-көтө муһуннулар. Күнүс 12 чааска байыаннай эпэрээссийэҕэ сураҕа суох сүппүт буойуннарбытын кэриэстээн биир мүнүүтэлээх тохтобул кэнниттэн бырааһынньыктааҕы тэрээһиммит саҕаланна.
Бастатан туран, Арассыыйа үрдүнэн биллэриллибит «Арассыыйа инниҥ диэки» акция чэрчитинэн «Велопробег – 2026» күрэххэ, сааһыттан тутулуга суох, уопсайа 15 оҕо-аймах кыттыыны ылла.
200 м. дистанцияҕа кыттааччылар билисипиэтинэн куоталаһыыга туруннулар, манна, мөккүөрэ суох Дьокуускай куораттан ыалдьыттыы кэлэ сылдьар 9 кылаас үөрэнээччитэ Анна-Елизавета Слепцова ылла. Иккис миэстэҕэ Депутатскайтан кэлэ сылдьар 5 кылаас үөрэнээччитэ Эрхан Чичигинаров кыайыыны ситистэ. Үһүс бочуоттаах миэстэҕэ 4 кылаас үөрэнээччитэ Александр Голиков таҕыста.
Бары кыттааччылар, кыраларыттан улаханнарыгар диэри саастаах оҕолор дистанцияларын толордулар, ким да туораабата. Саамай кыра саастаах кыттааччылар: Ярослав Слепцов, Света Болтунова, Джемма Барабанская, Валюша Протодьяконова – 2 кылаас үөрэнэччилэрэ.
Иккис күрэхпитинэн «Марафон – 2026» буолла, манна эмиэ кыратыттан улаханыгар диэри саастаах оҕолор кытыннылар. 200 м. дистанцияҕа уопсайа 22 оҕо кытынна.
Манна мөккүөрэ суох 9 кылаас үөрэнээччитэ Георгий Протодьяконов бастаата. Иккис миэстэни Депутатскайтан кэлэ сылдьар биир дойдулаахпыт, 7 кылаас үөрэнээччитэ Даниэль Абрамов ылла. Уонна үһүс бочуоттаах миэстэҕэ таҕыста эмиэ Депутатскайтан кэлбит ыалдьыппыт Эрхан Чичигинаров.
Кыайыылаахтарга Арассыыйаҕа норуот сомоҕолоһуутун, Саха Өрөспүүбүлүкэтигэр культура уонна Усуйаана улууһугар чэгиэн турук сылларыгар аналлаах мэтээллэр уонна грамоталар туттарылыннылар.
Бары кыттыыны ылбыт дьоммутугар Туматтааҕы Семен Дьяконов аатынан культура дьиэтин аатыттан махталбытын тиэрдэбит. Эһиэхэ ыраас халлааны, чэгиэн-чэбдик доруобуйаны, үөрэххитигэр-үлэҕитигэр үрдүктэн үрдүк ситиһиини баҕарабыт.
Андриян Горохов