Мин, Юлия Ивановна Ефимова, Сайылык нэһилиэгин олохтооҕо, бэтэрээн учуутал, СР үтүөлээх учуутала, учууталлар учууталлара, РФ бэтэрээн учуутала, буолаары турар Учуутал күнүнэн сибээстээн, П.Н. Николаев аатынан Силээннээх орто оскуолатыгар үлэлии сылдьар биир идэлээхтэрбин, үөрэнээччилэри, үлэһиттэри саҥа 2025-2026 үөрэх дьыла саҕаламмытынан итиитик-истиҥник ис сүрэхпиттэн эҕэрдэлиибин!
Эһиэхэ үлэҕитигэр, үөрэххитигэр үрдүктэн үрдүк ситиһиилэри баҕарабын, ыарахаттартан чаҕыйбакка иннигит диэки баран иһиҥ, доруобай буолуҥ, чөл буолуҥ!
Түгэнинэн туһанан, улуус хаһыатын нөҥүө олохтоох дьаһалтаҕа, культура үлэһиттэригэр, оскуолам коллективыгар, үөрэнээччилэргэ, кинилэр төрөппүттэригэр, үөрэппит оҕолорбор (начальнай кылааска 18 выпуһу бүтэртэрбитим), нэһилиэгим дьонугар дириҥ махталбын биллэриэхпин баҕарабын.
Мин үөрүүбүн тэҥҥэ үллэстэн, туох баар ыытыллар тэрээһиннэргэ, Улуу Кыайыы 80 сылыгар аналлаах сыл устата миигин кытта куруук бииргэ буолан, бука бары эһиги өрүүтүн миэхэ күүс-көмө буолаҕыт. Мин онтон сэниэ киллэринэбин, ыалдьары да, кырдьыыны да умнабын.
Учуутал буолбуппун дьолбунан ааҕабын. Ханна да тиий, ханна да бар-кэл, өрүүтүн үөрэппит оҕолорум, биир идэлээхтэрим көрсөллөр, бу наһаа үчүгэй, мин онтон олус астынабын, үөрэбин. Барытын ис дууһабар иҥэринэ сылдьабын, хайдах диэн махтаныахпын, хайдах гыныахпын билбэппин.
Онон сүһүөхтээх бэйэм сүгүрүйэбин, махтал – баһыыба тылларын этэбин. Эһиги үтүө көмөҕүт, сырдык санааҕыт үйэлэртэн үйэлэргэ салгыы бара туруохтун.
Дом! Дом! Дом!
Юлия Ефимова, улуус бочуоттаах гражданина, “Уһун үйэ” бэлиэ хаһаайына, сэрии оҕото