АЛГЫС
Үүнэр үйэҥ тухары
Үтүө санаа кутун тут,
Киһи чиэһин харыстыыр
Килбиэн көҕүн туругурт.
Өйдөөр, доҕоор, эдэргэр
Өс-саас, өһүөн балайын,
Дьоҥҥо махтал аҕалар
Дьоһун санааҥ сырдыгын.
Хойох, ньоҕой дьэбэрэ
Хопторуттан эн сэрэн,
Кырдьык син биир күөрэйэн
Кыайарыгар бүк эрэн.
Түөрэх түһэн олоххор
Төлкөҥ суолун түстээтин,
Түмпүт үтүө ырыаҕар
Тэтимирэн үксээтин.
Эйигинниин сырдык күүс
Эҥэрдэстин диэммин мин,
Айыы тыла алгыстаах,
Доҕоор, нөрүөн нөргүйэбин!
БЭЛЭХТЭЭРИИЙ МИЧЭЭРГИН
Эдэр сааһым түгэннэрин
Эмиэ ахтан эрэбин,
Ол да иһин эйиэхэҕэ
Санааларбын этэбин—
Сыччах биири, биири эрэ
Көрдөһөбүн эйигиттэн:
Саһарҕаҕа тэҥнэбиллээх
Сылаас сырдык сүүрээнинэн
Түөспэр кутаа оттоҥҥун
Бэлэхтээриий мичээргин!
Сааһырыыга бэриммэппин,
Сайда туруо талааным,
Туохха даҕаны биэрбэппин
Хойутаабыт тапталбын.
Сыччах биири, биири эрэ
Көрдөһөбүн эйигиттэн:
Саһарҕаҕа тэҥнэбиллээх
Сылаас сырдык сүүрээнинэн
Түөспэр кутаа оттоҥҥун
Бэлэхтээриий мичээргин!
ТӨРӨӨБҮТ ТЫЛ
Төрөөбүт төрүт тыл туһунан
Санааҕар анааран көрөҕүөн,
Билиҥҥи сайдыынан туһанан
Тыл уоҕун-силиһин билэҕиэн?
Оо, доҕор, төрүт тыл сүмэтин
Кыаҕыгар ханнык күүс тэҥнэһиэй,
Күндэлии эттэххэ, кии сытын
Эйиэхэ дууһаҕар иҥэриэй?!
Төрөөбүт дьиҥ тылын билбэтэх
Ол омук аатыгар тиксибэт,
Сир-халлаан быыһыгар хаалбыты
Аан дойду омута билиммэт.
Ол иһин, доҕоруом, киэн тутун
Эн саха буоларгын чиҥэтэн,
Сүүс үйэ сахтардаах өбүгэҥ
Хааннарын сүрэххэр сөргүтэн.
Аҕыйах ахсааннаах да буоллар,
Мин сэргэх норуотум аатырыа,
Аан дойду билимин илииһэр
Киллэрбит кылаата хайҕаныа!
СВАРЩИК
Спецовка үтүлүгэ
Сиэммит сварка көй кыымар,
Күүрэр үлэ киһитэ
Дьонноругар ытыктанар.
Мааска кэппит бэйэтэ
Рыцарга маарынныыр,
Чаҕылыйар сытыы уот
Электродтан кылбаҥныыр.
Күрүс кэрэ музыканан
Кирдьиэтэнэр аппараат,
Уолга мантан кэлэр эбээт
Үлэтигэр албан аат.
Чаҕылыйа ыллыы туруо
Электродун куолаһа,
Үүнэр күнүн уруйдуо
Кырымахтаах көй кыыма.
Владимир ТОМСКАЙ-Күрүөкүннээх