Бэс ыйын отут күнүгэр илгэлээх Айыы тыынынан угуттанан, оһоллоох-моллоох орто дойду олоҕор оройбунан түспүтүм.
Бэс ыйын отут күнэ-
Бүгүн эмиэ бу үүннэ,
Сырдыык — сырдык уотунан,
Чаҕылыта оонньоото.
Бэс ыйын отут күнэ —
Бэртээхэй да кэрэ кэм,
Бэлэх тутар, бэлиэтэнэр,
Сааһыланар дьоро күнүм.
Самаан сайыны айхаллыыр,
Сардаана сибэкки кэриэтэ,
Сир ийэҕэ кэлбиппин,
Сир симэҕин киэргэтэ.
Орто дойду олоҕор
Омурҕаннаан ааһар кэм,
Олох долгунун устун,
Оргууй аҕай тиһиллэр.
Олоҕум суолун уруйдуур,
Ойуу- бичик чэчиктэр,
Орой мэник титириктэр
Оһуор анньан ааһаллар.
Кэлэр кэрэ кэмнэри,
Дьоллоох дьоро күннэри
Туоһулуурга дылылар,
Көрүлүү оонньуур көмүстэр
Бэс ыйын отут күнэ
Бэлэх тутар кэрэ кэм,
Бэлиэр тиийэн кэллэҕэ,
Бэскибэр бэлиэтээн аастаҕа.
Розалия Горохова, бэс ыйа, 2024 сыл