Саха сиригэр түөрт Социалистическай үлэ геройдаах — Колесов Николай Саввич, Аммосова Матрена Ивановна, Горохов Семен Васильевич, Быканов Прокопий Иннокентьевич ааттарынан сураҕырбыт, таба-кырса, балык, сир баайдаах Усуйаана улууһун биир дойдулаахтара күн бүгүнүгэр диэри киэн тутталлар.
Үлэһит туруу дьоннордоох улуус Үлэ геройдарыгар уонна улууска биллэр ытык-мааны дьонноругар анаан олунньу 8 күнүгэр Дьокуускай куоракка “Арчы дьиэтин” духуобунай культуратын киинигэр мустан, анаммыт тэрээһин үрдүк таһымҥа ааста. Кэлбит ыалдьыттар үөрэн-көтөн дуоһуйа сынньаннылар. Усуйаана түмсүүтүн иһинэн тэриллибит “Хотууна” вокальнай ансаамбыл кыргыттара кэрэ-чуор куоластарынан ылбаҕай ырыаларын бэлэхтээтилэр.
Салайааччы Ксения Дьячковская буолар. Кини өр сылларга “Сайсары” вокальнай ансаамбылга ыллаан кэллэ. Киирии тыл кэнниттэн “Хотууналар” Ирина Абрамова тылыгар, матыыбыгар “Бастыҥ аспыт чыыр балык” диэн ырыатыгар доҕуһуоллатан эмис чыыр балыгынан кэлбит ыалдьыттары күндүлээтилэр. Усуйаана улууһун түмсүүтүн актыыбынай кыттааччыларыгар улуус баһылыгын Валерий Сидорин уонна улуустааҕы культура управлениетын салайааччытын Аполлон Болтунов эҕэрдэ суруктарын туттардылар.
Айылҕаттан айдарыылаах ырыаһыттар Валентин Суздалов, Иннокентий Барабанскай-Ырыа Киэсэ, саха эстрадатын сулуһа Анатолий Горохов кэлэн бу көрсүһүүнү үрдүк үөрүүлээх түгэнин өссө төгүл умнуллубат кэрэ-бэлиэ ырыаларынан киэргэттилэр.
Бу дьоро киэһэ төрөөбүт төрүт тылларын илдьэ сылдьар, Антуанетта Абрамова салайааччылаах “Долгунча” этно-фольклорнай ансаамбыл аҕыйах ахсааннаах норуоттар “Һээдьэлэрин” толоруулара дьон биһирэбилин ылыан ылла.
Бу дьоро киэһэ тэрээһинин иилээн-саҕалаан ыытта Усуйаана улууһун түмсүүтүн 30 сыл устата салайан илдьэ кэлбит, Саха Өрөспүүбүлүкэтин үтүөлээх үлэһитэ, Саха Өрөспүүбүлүкэтин бочуоттаах бэтэрээнэ, үлэҕэ килбиэнин иһин мэтээл хаһаайына, Усуйаана улууһун бочуоттаах олохтооҕо Ирина Васильевна Абрамова.
Каджана Евсеева -Чэлгийэ, Дьокуускай куорат