Сааскы маҥнайгы бырааһынньык — кулун тутар 8 күнүгэр — “Түмсүү” култуура дьиэтигэр саала толору кэрэни кэрэхсиир, ырыаны-тойугу сөбүлүүр дьоммут тоҕуоруһа муһуннулар. “Кэрэ бэлэх” кэнсиэр иннинэ дириэктэр Андриян Горохов бырааһынньыгынан эҕэрдэлээн туран, “Чэлгийэ” дьахталлар вокальнай ансаамбылларыгар ыраах Липецкэй куораттан кэлбит 2-с истиэпэннээх Диплому (уус-уран салайааччы Мичил Томскай) туттарда. Бу ансаамбыл Бүтүн Арассыыйатааҕы кэтэхтэн куонкуруска бастакы кыттааһына буолар.
Кэнсиэрпитигэр олохтоох авторбыт Василий Слепцов бэйэтин суруйбут ырыаларын гитаранан толорон ыллаабыта сонун көстүү буолла. Үҥкүүһүттэр бөлөхтөрүн толорууларыгар “Ньургуһуннар”, “Чороонноох”, “Хотугулуу“ үҥкүүлэр туруорулуннулар.
Кэрэ аҥаардары ис сүрэхтэн эҕэрдэлээн ылбаҕай ырыаларын бэлэх ууннулар ырыаһыт уолаттарбыт: Савва Захаров, Павел Винокуров, Василий Слепцов, Мирон Константинов, ону тэҥэ көрөөччүлэр биһирэбиллэрин ылбыт Римма Томская, Людмила Горохова дуэттара. Итиэннэ кырачаан кыттааччыларбыт — оскуола үөрэнээччилэрэ: Аля Томская, Сима, Тина Бубякиналар, Света Горохова, Ева Легусина, Васияна Колесова уонна 2-с, 6-с кылаас үөрэнээччилэрэ ансаамбылынан толорон эҕэрдэлээтилэр. Ону сэргэ сэргэх, көрдөөх “Подарок” сыаҥканы көрөн күлэ-үөрэ сэргэхсийдибит.
Сарсыныгар үгэс буолбут кэрэ аҥаардар кыттыылаах, 2003 сылтан 13-с төгүлүн ыытыллар “Дьикти хонууга” ыалдьыттаатыбыт. Ыытааччы Андриян Христофорович мустубут дьону эҕэрдэлээн туран, кылгастык “Дьикти хонуу” устуоруйатыттан билиһиннэрдэ, биир-биир кыттааччыларын барабан иннигэр дохсун ытыс тыаһынан ыҥырда.
Манна куруук көхтөөхтүк кыттыыны ылар дьоммут – Марфа Абрамова, Ульяна Попова, Марфа Слепцова, Олимпия Легусина, Оксана Старостина, Лариса Тоскина, Марфа Кириллова, Ульяна Суздалова уонна Аэлита Колесова кыттыбыттара өссө бу оонньууга бэриниилээхтэрин туоһулуур.
Билиҥҥи оонньуубут сып-сап түргэн буолан биэрдэ. Сорох кыттааччылар оонньообокко да хааллылар. Финалга Лариса Тоскина, Олимпия Легусина, Оксана Старостина тиийдилэр гынан баран, бастакы кыттааччы Лариса Тоскина тылы барытын таайан, туораан хааллылар.
Түмүккэ Кыайыылаах аатын сүгэн Лариса Ивановна Тоскина супер бириис — электрическай мясорубканы тутан үөрдэ-көттө, бэйэтигэр сыаналаах бадаарак оҥоһунна. Көрөөччүлэрдиин оонньууга сөпкө хоруйдаан күүстээх аҥаарбыт — Савва Захаров бириис сүүйдэ. Бары кыттааччылар үгэс курдук “Дьикти хонуу” ойуулаах, бу сырыыга сибэккилээх, өйдөбүнньүк чааскылаах бардылар, хаартыскаҕа түстүлэр. Тохтобулга ыллам ырыалар ылланнылар, үтүө тыллар этилиннилэр.
Бары кыттыыны ылбыт актыбыыс дьоммутугар чөл туруктаныҥ, үөрүү-көтүү аргыстаах, олоҕу кытта тэҥҥэ хаамсыҥ диэн баҕа санаабытын тиэрдэбит. Кэрэ бэлэхтэр, “дьикти хонуулар” элбээн истиннэр, кэрэ киэһэлэр буола турдуннар.
Елизавета Горохова, Тумат нэһ.