Төрөөбүт төрүт тылбыт күнүгэр сылын аайы араас тэрээһиннэр ыытыллаллар. Ол курдук, олунньу 13 күнүгэр “Түмсүү” култуура дьиэтэ уонна олохтоох бибилэтиэкэ “Ийэ тыл илгэтэ” киэҥ тэрээһини тэрийэн ыыттыбыт. Сахалыы тыыннаах саалаҕа дьон өрө көтөҕүллэн туран кэлэн кытыннылар.
Ыытааччы — уус-уран салайааччы Мичил Томскай кэлбит дьону эҕэрдэлээтэ, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов олоҕун, үлэтин туһунан видеослайд көрдөрдө, сонун сэдэх С.А. Новгородов чугас дьонун туһунан видеослайд көрдөрүллэн сэҥээриини ылла.
Хоһоон ааҕыытын күрэһэ тэриллэн сахалыы сайбаччы таҥныбыт оскуола оҕолоро: Рая Барабанская, Диана Иванова уо.д.а. оҕолор төрөөбүт Туматтарын, дойдуларын туһунан элбэх хоһоон аахтылар. Аһаҕас микрофон — хоһоону дорҕооннохтук ааҕыы ыытыллан кыратыттан улаханыгар тиийэ кытыннылар. Ону тэҥэ билиини тургутар блиц-ыйытыыларга — тыл оонньууларыгар кыттан билиилэрин чиҥэттилэр.
Быйылгы сахалыы өрөспүүбүлүкэтээҕи дьыктааммыт суруйааччы Тимофей Сметанин “Кыайбыттар ыһыахтара” кэпсээнинэн сурулунна, олохтоох балыыһа кэлликтиибэ манна тэрилтэнэн кэлэн кыттыыны ылбытын бэлиэтиир тоҕоостоох; кэлбит дьоммут олус көхтөөхтүк кытыннылар. Бары кыттыбыт дьоммутугар туоһу суруктар туттарылыннылар.
Дьыктаан түмүгүнэн Олимпия Легусина “Бастыҥ суруксут”, Екатерина Томская “Үчүгэй суруксут“ аатын ыллылар. “Ийэ тыл — норуот тыына” кинигэ быыстапката туран дьон болҕомтотун тарта.
Күндү дьоммутугар, кырачааннарбытыгар махталбытын биллэрэн туран: «Төрөөбүт төрүт тылгытын байытыҥ, таптааҥ, харыстааҥ!» диэн алгыспытын тиэрдэбит.
Елизавета Горохова, Тумат нэһ.