Бу ааһан эрэр сыл бүтүүтүгэр куоракка ырыаны-тойугу таптааччыларга бэрт кэрэхсэбиллээх тэрээһин буолан ааста. Аата-суола республикаҕа биллэр дьахталлар “Сайсары” ансаамбылын 45 сыллаах отчуотун юбилейдаах кэнсиэрэ буолла. “Далбар хотун” ансаамбыл историята бу коллективка туох сыһыаннааҕый диир буоллахха, чахчы да сыһыаннаах диэҕи баҕарыллар.
2012-13 сс. “Далбар хотун” саамай чулуу, саамай тутаах ырыаһыттара К.И. Дьячковская уонна Е.Е. Попова Дьокуускай куоракка утуу-субуу көһөн барбыттара. Ансаамбылбыт ол түгэҥҥэ мөлтөөн ылбыта, эбиитигэр нотаны ааҕар идэтийбит музыкант суоҕа хара тэриллиэхпититтэн мэһэйдээбитэ.
Кыргыттарбыт ханна баҕарар сырыттахтарына дьону кытта уопсай тылы түргэнник булар, эйэҕэс-сайаҕас, кэпсэтинньэҥ буолан “Сайсары” ансаамбылы түргэнник булбуттара. Кинилэри үөрэтэр учууталлара Ураллааҕы консерватория выпускницата, культура бэтэрээнэ уонна туйгуна Светлана Константиновна Степанова истээт да академическай хоровой ырыаҕа барсаллар эбит диэн коллективка биир тыла суох ылбыта.
Дьэ манна саҕаламмыта иис үлэтин түбүгэ, маҕаһыыннары кэринии, тигэ олорон хос көтүрүү, ырыалары үөрэтии, аны сааһыра барбыт дьоҥҥо ырыа тыла өйгө киирэн испэтэ диэтэҕиҥ. Ол эрээри кыргыттар туох баар мэһэйи туоратаннар, төрүт ырыаһыттарга кылгас кэм иһигэр тэҥнэспиттэрэ.
Онтон ыла ырыаларын кыратык да тохтоппокко, күн бүгүнүгэр диэри ыллаан идэтийбит ырыаһыттартан хаалсыбат буоллулар. Юбилей кэмигэр үтүөлээх ансаамбылы үрдүктүк чиэстээтилэр наҕараада бөҕөтүн туттардылар.
Кыргыттарбыт тустарынан кылгастык кэпсээтэххэ, Ксения Ивановна олоҕун элбэх сылларын төрөөбүт улууһун үбүн-харчытын эҥкилэ суох ааҕыыга-суоттааһыҥҥа анаата. Билигин даҕаны ансаамбылын дьоҕус коллективын каассатын дүөгэлэрэ чуолаан киниэхэ туттараллар.
Оттон Екатерина Егоровна эдэр сааһыгар Депутатскайга кэлиэҕиттэн ыла бастаан быткомбинакка модельер таҥас быһааччынан, онтон инбэлииттэр оройуоннааҕы обществоларын өр кэмҥэ салайбыта. Бу икки ырыаһыт далбар хотуну ырыа бигэтик ситимнээбитэ.
Биһиги кыргыттарбыт ансаамбылга эрэ ыллыырынан муҥурдамматтар, кинилэр бу отчуоттуур кэнсиэртэригэр авторскай ырыалары ыллаатылар, чуолаан, хомойуох иһин, күн сириттэн барбыт бэйэбит кыыспыт, урут эмиэ ансаамбыл ырыаһыта, талааннаах мелодист Мария Егоровна Егорова айбыт “Музыка долгуна” ырыатын Ксения Дьячковская, оттон “Кыталыктар” ырыаны Екатерина Попова иэйиилээхтик ыллаатылар. Манна даҕатан эттэххэ, олохтоох автордар И.Н. Никулин суруйбут хоһоонугар, Т.А. Протопопова мелодиятыгар “Харыстыаҕыҥ айылҕаны” ырыаны ансаамбыл толоруутун көрөөччүлэр дохсун ытыс тыаһынан доҕуһуоллаатылар.
Түмүккэ, ырыаһыт дьүөгэлэрбитин достойнай наҕараадаҕа тиксибиттэринэн — “Саха Республикатын культуратын туйгуна” түөскэ анньыллар бэлиэни ылбыттарынан, Екатерина Егоровна “Саха Республикатын бочуоттаах старейшината” буолбутунан “Далбар хотун” ансаамбыл итиитик-истиҥник эҕэрдэлиир! Кэрэ куоласкыт өссө да уһуннук көрөөччүлэргитин үөрдэ турдун, бэйэҕит этэҥҥэ, доруобай буолуҥ!
Татьяна ГУЛУҤЭ