Усуйаана нэһилиэгэр Үлэ, Эйэ, Маай бырааһынньыгын өрө көтөҕүллэн туран бэлиэтээтилэр. Бу бэлиэ күҥҥэ аналлаах араас тэрээһиннэр дьону түмэ тартылар. Ол туһунан биһиэхэ олохтоох “Кэскил” култуура дьиэтин директора Матрена Попова сырдатта:
“Усуйаана нэһилиэгэр күөх Маай кэрэ бырааһынньыга чаҕылхайдык, сэргэхтик ааста. Быйыл биһиги нэһилиэкпит тэрилтэлэрэ, олохтоохтор бырааһынньыктааҕы парадка көхтөөхтүк кытыннылар. Сандал саас кэлбитин бэлиэтии мустубут дьон, үлэ кэллэктииптэрэ, оскуола оҕолоро араас өҥнөөх саарыктары өрө тутан, күөрэччи уунан, сомоҕолоһон хаамыыга кыттыстылар. Бу күн эҕэрдэ тыллар кэнниллэриттэн, тэрилтэ салайааччылара чахчы үлэ бырааһынньыга буолбутунан бастыҥ үлэһиттэригэр махтал суруктары туттаран үөртүлэр.
Ону таһынан оҕолорго сүүрүүлээх-көтүүлээх, ыһыылаах-хаһыылаах эстафета буолан ааста. Ол киэһэтигэр бырааһынньыктааҕы бэртээхэй эҕэрдэ кэнсиэркэ элбэх көрөөччү тоҕуоруһан муһунна.
Кэнсиэр саҕаланыыта, торжественнай чааска өр сылларга сыанаҕа култуура эйгэтигэр көхтөөхтүк кыттан кэлбит, сыана бэтэрээннэригэр “Уус-уран самодеятельность бэтэрээнэ» диэн мэтээллэри дохсун ытыс тыаһынан доҕуһуоллатан, түөстэригэр кэтэрдилиннилэр.
Ол курдук Барабанский Алексей Иванович, Попова Анастасия Афанасьевна, Барабанский Гаврил Гаврилович, Горохова Раиса Ивановна, Болтунова Евдокия Ивановна, Горохова Татьяна Егоровна, Батюшкина Валентина Алексеевна, Горохова Зоя Николаевна, Корякина Ирина Ивановна мэтээл кэтэн үөрүүлэрэ үксээтэ.
Уопсайа маннык мэтээли 9 киһи тутта. Бу ытык дьоммут куруутун бэйэлэрин талааннарынан, ырыаларынан-үҥкүүлэринэн кэнсиэртэри, бырааһынньыктары, тэрээһиннэри киэргэтэллэр, көрөөччүлэргэ умнуллубат түгэннэри бэлэхтииллэр.
Эҕэрдэ кэнсиэркэ кэлбит дьон бары сааскы бырааһынньыгы көрсөн, кыттыыны ылан, дуоһуйа сынньанан бардылар».
Надежда Петрова
