Тумат нэһилиэгэр бэс ыйын 23 күнүгэр самаан сайыны уруйдуур Үрүҥ Тунах ыһыах үрдүк тэрээһиннээхтик буолан ааста. Быйылгы тэрээһин Улуу Кыайыы 80 сылыгар ананна. Сылын аайы ыһыахтыыр «Лааҕыр суурда» томторго сайыҥҥы ыраас халлааҥҥа, сөп-сөрүүн тыаллаах күҥҥэ олохтоохтор тоҕуоруһа муһуннулар.
Аналлаах сирбитигэр олохтоох мас ууһа Евгений Евгеньевич Севостьянов туппут түөрт ураһаларыгар оскуола, балыыһа, оҕо уһуйаанын тэрилтэлэрэ, «Алгыс» кулууп кыттааччылара мустан, ону таһынан саҥа тэриллибит «Кэрэли» эдэр ийэлэр түмсүүлэрэ түһүлгэ тэринэн куонкуруска кыттан, бастакы миэстэ оскуола, иккис — «Кэрэли», үһүс — оҕо уһуйаанын тэрилтэлэрэ бары ирдэбили толорон кыайыылааҕынан таҕыстылар.
Ыһыах чэрчитинэн ыытыллыбыт спортивнай күрэххэ: 100 м. сүүрүүгэ дьахталларга Ольга Горохова бастаата, иккис Элла Горохова буолла. 200 м. эр дьоҥҥо бастакы миэстэни Иннокентий Аввакумов, иккис миэстэни Спиридон Слепцов ыллылар.
Саха национальнай спорт көрүҥэр — мас тардыһыыга Алистан Томскай бастаата, иккис миэстэни Петр Томскай ылла. Хапсаҕайга кыайыылааҕынан таҕыста Петр Томскай, иккис миэстэ буолла Сандал Горохов.
Олус кэрэхсэбиллээх «Бастыҥ уруу-аймах» күрэххэ Сардана, Юрий Томскайдар дьиэ кэргэттэрэ кыттан мини-холодильникка тигистилэр.
Күммүт-дьылбыт, үөһээҥҥи айыыларбыт көрдөһүүбүтүн ылынан, туран биэрдэ, сөрүүн, күннээх, ыраас халлааннаах күн буолла. Арай күрэхтэһии кэнниттэн оргууйдук ардах түһэн барда.
Бу курдук Тумат нэһилиэгин ыһыаҕа бэйэтин тула дьон бөҕөнү муста, бары биир тыынынан ыллаан-туойан, илии-илииттэн ылсан, тоҥолох-тоҥолохтон тутуһан, сарын-сарынтан өйөнсөн оһуохайдаан бэртээхэй ыһыаҕы ыыттыбыт.
Онтон киэһэ “Түмсүү” культура дьиэтигэр уоттаах-күөстээх сынньалаҥ биэчэрэ ньиргийдэ.
Ыһыахха көхтөөх кыттыыны ылбыт бары тэрилтэлэрбитигэр, түмсүүлэрбитигэр, атыы-эргиэн, шашлык астаан, кымыс утаҕынан күндүлээбит чааһынай урбаанньыттарга улахан махталбытын тиэрдэбит.
Андриян Горохов