Россияҕа норуоттар сомоҕолоһууларын, Саха сиригэр культура уонна оройуоммутугар доруобуйаны туругурдуу сылларын чэрчитинэн, муус устар 26 күнүгэр Тумакка «Түмсүү» культура дьиэтигэр эр дьон икки ардыларыгар бильярдка көһөрүллэ сылдьар «Кубок ДК» муус устардааҕы турнир буолан ааста. Бу спортивнай күрэх Республикабыт күнүгэр ананна.
Күрэхтэһиигэ сэттэ эр бэрдэ кыттыыны ылла. Түмүк хайдах таҕыста?
Күөх сукуна тула күүрээннээх киирсиилэр кэннилэриттэн чемпион үрдүк аатын уотунан хааччыйар тэрилтэ үлэһитэ Антон Слепцов, 2-с миэстэни оскуола директора Виул Ребров, 3-с бочуоттаах миэстэни итиинэн хааччыйар тэрилтэ үлэһитэ Илья Горохов ыллылар.
Манна диэн эттэххэ, Тумакка бильярды сөбүлээччилэр элбэхтэр, ол эрээри саас кэлэн сорохтор бу күрэххэ араас биричиинэнэн кыттыыны ылбатылар. Билигин сылбыт саамай түбүктээх бириэмэтэ буолан аныгыскы турнирга диэри сынньалаҥ биллэрилиннэ.
Бары кыттааччыларга, ыалдьааччыларга “Түмсүү” культура дьиэтин аатыттан махталбытын тириэрдэбит.
Андриян Горохов