Алтынньы 7 күнүгэр Хаһааччыйа нэһилиэгэр «Ытык саас көмүс ыллыгынан» диэн кырдьаҕастар күннэригэр аналлаах дьоро киэһэ үрдүк таһымҥа буолан ааста.
Бу дьоро киэһэҕэ ытык дьоммутугар Хаһааччыйатааҕы оҕо искусствотын оскуолатын үөрэнээччилэрэ уонна «Сайдыы» култуура дьиэтин улэһиттэрэ эҕэрдэ эриэккэс ырыаларын, намыын тэтимнээх үҥкүүлэрин анаатылар, бэлэх ууннулар.
Аҕам саастаах убаайдарбыт, эдьиийдэрбит төгүрүк остуол тула олорон итии үүттээх чэй иһэ-иһэ араас тэриллибит көхтөөх күрэхтэргэ, оонньууларга кытыннылар, оҕолуу эрчимнии үөрэн-көтөн дайдылар, баян доҕуһуолунан дууһалыын кынаттанан дуоһуйа-сынньана ыллаатылар-үҥкүүлээтилэр.
Бу үөрүүлээх күҥҥэ култуура эйгэтигэр эдэр саастарыттан сыстыбыт, култуура сайдыытыгар кылааттарын уурбут ытык дьоммутугар «Сайдыы» дьиэтин аатыттан махтал суруктары туттардыбыт.
Аҕам саастаах кырдьаҕастарбытыгар тапталбыт, убаастабылбыт, махталбыт муҥура суох. Кырдьар диэҥҥэ кыһаллыбакка, ыарыы диэни ылыммакка, чиргил чэгиэн доруобуйаланыҥ, уу чуумпу олохтонуҥ, ыбылы дьоллоох суолланыҥ, үрдүк түөлбэлэниҥ, үчүгэй тыл мүөттэниҥ, дьон хамсыырын толоруҥ, алгыс курдук олоруҥ!
Үлэҕэ-хамнаска баай уопуккутун, олоххо-дьаһахха муудараскытын, үтүө-мааны майгыгыт үүнэр эдэр көлүөнэҕэ үтүө холобур буоларын билинэбит уонна истиҥник эһиэхэ махтанабыт.
Елена Горохова, ДК «Сайдыы»