Олунньу 10 күнүгэр Усуйаана нэһилиэгэр “Кэскил” култуура дьиэтигэр «Аартык» ансаамбыл 10 сылын бэлиэтээтибит.
Бырааһынньык бэрт учугэйдик ааста, Хаһааччыйа бөһүөлэгиттэн анаан кэлбит ытык-мааны ыалдьыттарбыт араас ылбаҕай ырыаларын бэлэх ууннулар, ол курдук биэчэрбитин киэргэппит күндү ыҥырыылаах ыалдьыттарбытыгар улахан махталбытын тиэрдэбит — И.И. Томскай аатын сүгэр «Сайдыы» култуура дьиэтин директорыгар Юлия Кирилловна Семеноваҕа уонна коллективыгар, «Дьүкээбил суһума» ансаамбыл салайааччытыгар Евдокия Никитична Филипповаҕа , «Чэлгийээнэ» ансаамбыл коллективыгар уонна салайааччытыгар Наталия Николаевна Абрамоваҕа , «Алгыс» ансаамбыл коллективыгар салайааччы Гуляева Ирина Степановнаҕа , ону таһынан олохтоох дьаһалта баһылыгар София Андреевна Олесоваҕа уонна коллективыгар, олохтоох «Эйгэ» дьахталлар түмсүүтүн кэрэ аҥаардарыгар Туяра Николаевна Колодинскаяҕа, Эльвира Гаврильевна Михайловаҕа, Марфа Сидоровна Гороховаҕа, Агафья Васильевна Тоскинаҕа, Юрико Евгеньевна Дохунаеваҕа, Турсунай Сандаара Дьуурай кыыһыгар, Зоя Андреевна Михайловаҕа, Валентина Алексеевна Батюшкинаҕа, Вера Дмитриевна Нерловаҕа, баяҥҥа доҕуһуоллаабыт күндү ыалдьыппытыгар Петр Титович Барабанскийга, Усуйаанабыт бочуоттаах олохтооҕор, сыана бэтэрээнигэр Алексей Иванович Барабанскийга, Социалистическай Үлэ Геройа С.В. Горохов аатынан оскуола директорыгар Диана Евгеньевна Батюшкинаҕа, «Кэскил» култуура дьиэтин коллективыгар, ылбаҕай ырыалардаах “Аартык” ансаамбыл састаабыгар.
Бырааһынньык бастаан эҕэрдэ кэнсиэринэн саҕаланна, ол кэннэ ыҥырыылаах ыалдьыттарга банкет буолла. “Аартык” ансаамбыл бастакы салайааччыта Александра Евтрофеевна Барабанская өр кэмҥэ иилээн-саҕалаан тутан үлэлээбитэ, билигин, хомойуох иһин, бу орто дойдуттан туораабыта хомолтолоох. Бу дьоро киэһэ кини тапталлаах кэргэнэ Алексей Иванович Барабанский дьонугар-сэргэтигэр тыл эттэ уонна оҕолорун аатыттан минньигэс туорт бэлэх уунна, ити курдук элбэх кэрэ тыллар этилиннилэр, сэмэй бэлэхтэр туттарылыннылар. Культура уонна духовнай сайдыы управлениетын салайааччыта Аполлон Николаевич Болтунов махтал сурук ыыппытын ааҕан иһитиннэрдилэр.
Баҕарыа этибит айар тутар үлэҕитигэр үрдүк ситиһиилэри доруобуйаны, өссө да эдэрдии эрчимнээхтик ыллыы-туойа сылдьыҥ, дьоллоох буолуҥ, бар дьоммут!
Матрена Попова