Саха сиригэр кулун тутар 5 күнүгэр бэлиэтэнэр Норуот маастарын күнүн уонна Кыайыы 80 сылын чэрчитинэн, ыраах хоту Дьааҥы эбэ үрдүгэр турар, араас балыгынан-түүлээҕинэн маанылаабыт Усуйаана нэһилиэгэр, “Кэскил” култуура дьиэтигэр илиилэригэр талааннаах иистэнньэҥнэр, өбүгэлэрбит үйэлэри уҥуордаан илдьэ кэлбит үгэстэрин харыстыы сылдьан сайыннарар уус тарбахтаах кэрэ аҥаардар көмөлөрүнэн, киһи эрэ кэрэхсиэх быыстапката турда.
Ол курдук, маһынан, тааһынан, тимиринэн, туойунан, муоһунан, тириинэн, балык тириититтэн, түүлээҕинэн, уо.д.а. араас матырыйаалынан уус-уран оҥоһуктары оҥорон быыстапкаҕа туруоран көхтөөх кыттыыны ыллылар Михайлова Эльвира Гаврильевна, Слепцова Людмила Петровна, Корякина Ирина Ивановна, Батюшкина Евдокия Михайловна, Батюшкина Виктория Викторовна, Сыроватская Улита Васильевна, Барабанская Елена Кирилловна, Колодинская Туйаара Николаевна, Михайлова Екатерина Антоновна, Батюшкина Диана Евгеньевна уо.д.а. айар-тутар үлэлээх, мааны-талба талааннаах, иис абылаҥар дууһаларын уурбут далбар хотуттарга алгыс маанытын, баһыыба бастыҥын этэбит.
Ону таһынан 2024 сыл ахсынньы 12 күнүгэр бэлиэтэнэр, Ассоциация КМНС «Дуннэдув» — Земле моей диэн III-с Республиканскай хотугу норуоттар маастардарын быыстапкаларыгар биһиги биир дойдулаахтарбыт — уран тарбахтаах «Уһуйаан» куруһуок салайааччылаах, Социалистическай Үлэ Геройа Горохов С.В. аатын сүгэр Усуйаана оскуолатын учуутала Никифорова Виктория Федоровна уонна үрдүкү кылаас үөрэнээччилэрэ Михайлова София, Слепцова Аделия үрдүк ситиһиилээхтик кыттаннар, дьон биһирэбилин ылан үөрүү кынаттаах сонун төрөөбүт түөлбэбитигэр тилиһийэ көттө, Усуйаанабыт аатын ааттатта.
Дьэ бу курдук айар-тутар талба талааннаах дьоммутугар баҕарабыт ситиһиигит өссө да үксээтин, айар үлэҕит арыллан сайдан истин, тус олоххутугар баай-талым дьоллоох олоҕу!
Матрена Попова