Тумакка «Күнү көрсүү» сиэр-туом бырааһынньыга ыытылынна

Тумакка «Күнү көрсүү» сиэр-туом бырааһынньыга ыытылынна

Үгэскэ кубулуйбут сиэр-туом бырааһынньыгын, тыйыс чысхаан тымныылаах, будулуйар буурҕалаах, чоҕулуспут сулустардаах Тумат нэһилиэгэр, үс ыйдаах хотугу хараҥа күннэр кэннилэриттэн, күүтүүлээх күммүт саҕахтан сандаара тахсар үөрүүтүн үллэстэ, тохсунньу 21 күнүгэр сарсыардаттан олохтоохтор культура дьиэтин тэлгэһэтигэр, үөрэ-көтө муһуннулар.

Тумакка «Күнү көрсүү» сиэр-туом бырааһынньыга ыытылынна

Бырааһынньыктыы киэргэтиллибит тэлгэһэҕэ тордох туруоруллубут, улахан отуу уотугар чэй, эбиэт уута оргутулла ууруллубуттар. Күммүт оруобуна тахсар кэмигэр, күнүс 12 чаас 45 мүнүүтэҕэ, ыытааччы — «Түмсүү» культура дьиэтин  үлэһитэ Мичил Томскай сиэр-туом бырааһынньыгын билиһиннэрбитин кэнниттэн, алгысчыт: чулуу табаһыт, Саха сирин тыатын хаһаайыстыбатын туйгуна, Усуйаана улууһун бочуоттаах олохтооҕо Маркел Иванович Слепцов Аал уотун аһатан, күн тахсар сирин диэки сүгүрүйэн туран айыылартан баай-байылыат, быйаҥнаах олоҕу көрдөстө. Мустубут дьон алгысчыты үтүктэн күн диэки илиилэрин уунан күүс-уох иҥэриннилэр, ыраастаннылар.

Тумакка «Күнү көрсүү» сиэр-туом бырааһынньыга ыытылынна

Онтон салгыы 1957 сыллаахха Иван Васильевич Слепцов суруйбут сээдьэтин уус-уран самодеятельность кыттыылааҕа Павел Винокуров этиитигэр үөрэ-көтө эргийдибит. Хоту дьон эрчимнээх музыкаларыгар тымныыны-чысхааны билбэккэ үҥкүүлээн битийэн биэрдибит.

Тумакка «Күнү көрсүү» сиэр-туом бырааһынньыга ыытылынна

Культура дьиэтигэр мустубут ыалдьыттары үүттээх итии чэйинэн, алаадьынан, тоҥ балыгынан, очоҕос миининэн, сыалаах этинэн күндүлээтибит, ол быыһынан уус-уран самодеятельность кыттыылаахтарын күүһүнэн концерт буолла.

Тумакка «Күнү көрсүү» сиэр-туом бырааһынньыга ыытылынна

Ханнык да бырааһынньыкка буоларын курдук күүстээх бөҕөстөр икки ардыларыгар күөн күрэс былдьаһыытыгар, өбүгэлэрбит оонньуулара буолла. Ол курдук «маамыкта быраҕыытыгар» уон биир киһи кыттыбытыттан оскуола үлэһитэ Павел Винокуров тэҥнээҕин булбата, үһүс быраҕыытыгар уон очукуону ылан кыайыылааҕынан таҕыста.

Тумакка «Күнү көрсүү» сиэр-туом бырааһынньыга ыытылынна

ДЭС үлэһитэ Антон Слепцов биэс очукуону ылан иккис бочуоттаах миэстэҕэ тигистэ. Дьахталлар да туора турбатылар. «Тугутчаан» оҕо уһуйаанын үлэһитэ Юлия Горохова үс очукуону ылан кыайыылаах таҕыста. Онтон икки очукуону ылбыт пенсионерка Варвара Слепцова иккис миэстэ буолла.

Тумакка «Күнү көрсүү» сиэр-туом бырааһынньыга ыытылынна

Онтон салгыы эр дьоҥҥо «балык былдьаһыы» күрэҕэр ДЭС үлэһитэ Антон Слепцов кыайыылаах буолла, иккис миэстэни олохтоох администрация үлэһитэ Юрий Томскай ылла. Үгэскэ кубулуйбут өбүгэлэрбит күрэҕэр — «наарта ыстаныытыгар» 29-та ойон ДЭС үлэһитэ Антон Протодьяконов бастакы миэстэ буолла, Антон Слепцов (эмиэ ДЭС үлэһитэ) иккистээтэ. Кыайыылаахтарга Семен Дьяконов аатынан культура дьиэтин аатыттан грамота уонна сыаналаах бириистэр туттарылыннылар.

Тумакка «Күнү көрсүү» сиэр-туом бырааһынньыга ыытылынна

Дьэ бу курдук күүтүүлээх үрүҥ күммүтүн үөрэн-көтөн, эппитин-хааммытын эрчийэн көрүстүбүт. Мантан салгыы күммүт уһаан, халлааммыт сырдаан, таһырдьа оҕо-аймах саҥатынан туолуо. Барыгытыгар чэгиэн-чэбдик доруобуйаны, ыраас эйэлээх халлааны, сырдык күн анныгар дьоллоох, нус-хас олоҕу баҕарабыт.

Тумакка «Күнү көрсүү» сиэр-туом бырааһынньыга ыытылынна

Кыттыыны ылбыт, тэрээһини тэрийсибит, көмөлөспүт дьоммутугар Семен Дьяконов аатынан «Түмсүү» культура дьиэтин үлэһиттэрин ааттарыттан махталбытын тиэрдэбит.

Андриян Горохов

Читайте дальше