Улуу Кыайыы 80 сылыгар, Арассыыйаҕа Аҕа дойдуну көмүскээччи уонна Саха сиригэр Ийэ дойдуну көмүскээччи сылларын чэрчитинэн, олунньу 23 күнэ Тумат эр бэртэригэр икки бүк үөрүүлээх, өрө көтөҕүллүүлээх күнүнэн буолла.
Дойдубутугар суолталаах бырааһынньыкпыт үөрүүлээх арыллыытын устуоруйатын билиһиннэрии кэнниттэн С.Н. Дьяконов аатынан “Түмсүү” култуура дьиэтигэр киэһэ 16 чаастан бэлэмнэммит саалаҕа олохтоох дьаһалта баһылыгын В.А. Лебедев кубогар бэрт сэргэх, өрө көтөҕүүлээх “Өбүгэ оонньуулара” ыытылынна. Бу күрэх улууска аан маҥнайгынан Тумакка ыытыллыбыта, үгэскэ кубулуйан үһүс сылын ыытылла сылдьар. Дьаһалта баһылыга Василий Лебедев үөрүүлээх быһыыга-майгыга эҕэрдэ тылын кэнниттэн күөн күрэһи арыйда.
Аҕыс түһүмэхтээх оонньууга уопсайа 6 эр бэртэрэ күөн көрүстүлэр, күрэс былдьастылар. Ол курдук Арассыыйа Аарымыйатыгар ытык иэстэрин төлөөн сулууспалаабыт эдэр эрчимнээх ыччаттарбыт: итиинэн хааччыйар тэрилтэ үлэһиттэрэ Иннокентий Аввакумов, Сентябрь Емельянов, уотунан хааччыйар тэрилтэ үлэһитэ Антон Слепцов, эдэр ыччат түмсүүттэн кыттыыны ыллылар Руслан Томскай, Эрхан Горохов, Юрий Горохов.
Түһүмэхтэрбитигэр: ойбонтон уулааһын, мүһэ былдьаһыы, бэһирик сүүрдүү, кириэс тэбии, илии аннынан тутум маһынан тахсыы, ох саанан ытыы, өһөс торбос уонна наарта ыстаныы киирбиттэрэ. Өрө күүрүүлээх тыҥааһыннаах күрэхтэһии кэнниттэн иккис сылын кыттыыны ылбыт Сентябрь Емельянов муҥутуур кыайыылааҕынан таҕыста, 2 миэстэҕэ Иннокентий Аввакумов, 3-кэ Руслан Томскай буоллулар.
Судьуйанан «Түмсүү» култуура дьиэтин дириэктэрэ Андриян Горохов, оскуола дириэктэрэ Виул Ребров, арбитрынан физкультура учуутала Василий Легусин, комментаторынан — история, общество учуутала Савва Захаров үлэлээтилэр. Миэстэлэспиттэргэ Добун сурук, сыаналаах бириистэр, оттон кыттыыны ылбыттарга Туоһу суруктар, күүс-көмө буолбут дьоммутугар Махтал суруктар туттарылыннылар.
Тохтобул кэмигэр Туяра Бубякина, Алексей Горохов, оскуола 4-с кылааһын үөрэнээччилэрэ Христина Бубякина, Женя Горохов эҕэрдэ ырыаларын бэлэх ууннулар.
Күүстэрин холоһон күрэххэ кыттыбыт уоланнарбытыгар олоххо дьулууру, үрдүк ситиһиилэри, чэгиэн доруобуйаны баҕарабыт.
Елизавета Горохова