Бүгүн, алтынньы 1 күнүгэр, Хайыр нэһилэгин олохтооҕо, Аҕа дойду улуу сэриитин тыылын бэтэрээнэ, үлэ бэтэрээнэ, Усуйаана улууһун бочуоттаах гражданина уонна уһун үйэлээҕэ, ытык кырдьаҕас Слепцов Павел Петрович үөрүүлээх үбүлүөйэ үүннэ, кини 90 сааһын томточчу туолла.
Павел Петрович өр сылларга культура хайысхатыгар, Хайыр нэһилиэгин культуратын дьиэтигэр киинэ механигынан бэриниилээхтик бочуоттаах сынньалаҥҥа тахсыар диэри үлэлээбитэ. Кини бэйэтин үлэтинэн биир дойдулаахтарыгар элбэх үтүө өйдөбүллэри хаалларан, кинилэр убаастабылларын ылбыта.
“Усуйаана улууһа (оройуона)” муниципальнай тэриллии администрацията ытык кырдьаҕаспытын өрөгөйдөөх үбүлүөйүнэн, 90 сааһын туолар күнүнэн ис сүрэхтэн тахсар истиҥ тылларынан үөрэн-көтөн туран эҕэрдэлиир!
Павел Петровичка кытаанах доруобуйаны, уһун олоҕу, өрүү чугас дьонун-сэргэтин, оҕолорун-сиэннэрин тапталларыгар, убаастабылларыгар бигэнэ, кырдьар диэни билиммэккэ 100 сааһыгар диэри сүһүөҕүн үрдүгэр этэҥҥэ сылдьарыгар баҕарабыт!
“Усуйаана улууһа (оройуона)” МТ администрацията