Ханнык баҕарар киһиэхэ бастакы оскуола, маҥнайгы учуутал кини инники үөрэҕэр, олоҕор, дьылҕатыгар ураты суолталаах буолар. Бүгүн суруйар учууталым, Елизавета Сергеевна эмиэ элбэх оҕоҕо ураты суолталаах киһи буолар. Кини мин оскуолаҕа учууталлыы кэлбиппэр маҥнайгы хардыыларбар, идэбин толору баһылыырбар үтүө сүбэһит, холобур оҥостубут киһим буолар.
Елизавета Сергеевна Колесова 1955 сыллаахха Усуйаана улууһун Тумат нэһилиэгэр төрөөбүтэ. Аҕата Колесов Сергей Иванович «Усуйаана» сопхуоһун «Тумат» отделениетын орденнаах, аатырбыт булчута, онтон ийэтэ Колесова Улита Ильинична «Усуйаана» сопхуоһун бэтэринээрэ этэ.
Кыракый Лиза 1962 сыллаахха Тумат нэһилиэгин аҕыс кылаастаах оскуолатын бастакы кылааһын үөрэнээччитэ буолбута.
Оскуолаҕа үөрэнэр сылларыгар, син биир атын оҕолор курдук, октябренокка, онтон кыһыл хаалтыстаах пионерга, салгыы комсомолга киирэн, оҕо оҕо курдук бэрт ситиһиилээхтик үөрэммитэ. Кылааһыгар куруутун бастыҥнар кэккэлэригэр сылдьара, үгүс учууталлар сөбүлүүр, убаастыыр үөрэнээччилэрэ буола улааппыта.
Оччолорго Тумат аҕыс кылаастаах оскуолатын үгүс оҕолоро орто оскуоланы бүтэрэр сыалтан, салгыы Хаһааччыйа орто оскуолатыгар баран үөрэнэллэрэ. Онон Елизавета Сергеевна икки сыл үөрэнэн Хаһааччыйа орто оскуолатын бүтэрбитэ.
1973 cыллаахха Саха сириттэн уонча буоланнар Магадан куоратын педагогическай институтугар киирии тургутуутун этэҥҥэ ааһаннар, устудьуон буолар үрдүк ааты сүкпүттэрэ.
1973-1977 сс. устудьуон көрдөөх-нардаах олоҕо биллибэккэ ааспыта.
1977-2019 сс. Усуйаана улууһун Тумат аҕыс кылаастаах, кэлин Тумат орто оскуолатын началынай кылааһын учууталынан ситиһиилээхтик үлэлээбитэ.
Елизавета Сергеевна бэйэтин идэтигэр олус бэриниилээҕэ, ис дууһатыттан кыһаллан туран, үгүс сыратын, күүһүн-күдэҕин оҕолорго анаабыта. Оскуола боруогун саҥа атыллаабыт кырачааннарга иккис ийэ кэриэтэ буолбута. Хас биирдии уруогун барытын ымпыгар-чымпыгар тиийэ толкуйдаан ыытара. Араас экскурсиялары, походтары, кылаас чаастарын, көрсүһүүлэри тэрийэрэ.
Елизавета Сергеевна уруогар оҕолор бары кулгаах да харах буолан олороллоро, учуутал тугу саҥарарын өйдөөн истэллэрэ. Кини оннук холкутук туттара, оһуобай дикциялааҕа, тылынан быраҕаттаммат, элбэхтэ сэрэтиини оҥорбот майгылааҕа. Биир эмэ оҕо атыҥҥа аралдьыйдаҕына, кэпсии туран ах бардаҕына, бары оҕо болҕомтото учууталга буола түһэрэ. Учуутал барыта оннук эбитэ буоллар.
Үлэлээбит кэмин тухары тапталлаах учууталбыт бөһүөлэк хас да көлүөнэтин умсугутуулаах билии-көрүү эйгэтигэр ааны аһан, олох киэҥ аартыгар атаарбыта. Үөрэппит оҕолоро үрдүк билиилээх, үтүө-мааны майгылаах үлэһит буоланнар, дойдубут, республикабыт, улууспут, нэһилиэкпит сайда-чэчирии турарын туһугар араас эйгэҕэ ситиһиилээхтик үлэлии сылдьалларыттан киэн туттабыт. Олоҕун тухары үлэни өрө туппут, ону суолдьут сулус оҥостубут коллегабыт күн бүгүн бочуоттаах сынньалаҥҥа олорор.
Ити курдук Елизавета Сергеевна Тумат оскуолатыгар түөрт уонтан тахса сыл эҥкилэ суох, үтүө суобастаахтык үлэлээбитэ.
Елизавета Сергеевна үс оҕолоох, бары үрдүк үөрэхтээхтэр. Кыра уола Легусин Василий Николаевич Саха государственнай университетын физкультураҕа салаатын бүтэрэн, Тумат орто оскуолатын физкультураҕа учууталынан үлэлээбитэ номнуо уонтан тахса сыла буолла, Легусиннар педагогическай династиялара салҕанар.
Елизавета Сергеевна үтүө суобастаах, таһаарыылаах үлэтин Саха сирин үөрэх салаатын министерствота үрдүктүк сыаналаабыта. Кини Саха Өрөспүүбүлүкэтин үөрэҕин туйгуна, РФ үөрэҕин бочуоттаах үлэһитэ, Саха Өрөспүүбүлүкэтин үөрэҕин систематын бочуоттаах бэтэрээнэ.
Людваря Слепцова