Майя Павлова диэн Хаһааччыйаттан төрүттээх биир дойдулаахпыт туһунан биһиги урут да суруйан турардаахпыт. Кини билигин Сунтаар улууһугар олорор, биэс оҕолоох улахан дьиэ кэргэн истиҥ ийэтэ, мааны ыал хаһаайката, дьиҥнээх саха Далбар Хотуна буолар. Улахан уола Лев Павлов эдэр да буоллар, Саха сирин биллиилээх тустууга, көҥүл тустууга Европа юниордарга чөмпүйүөнэ, Арассыыйа юниордарга чөмпүйүөнэ, улахан дьоҥҥо Арассыыйа чөмпүйэнээтигэр үрүҥ көмүс призер, Арассыыйа спордун маастара, бэрэсидьиэн Владимир Путин талааннаах оҕолору өйүүр гранын стипендиата. Майя Афанасьевна ииһинэн утумнаахтык дьарыктанан, уран тарбаахтаах иистэнньэҥнэр араас күрэхтэригэр кыттан айар-тутар үлэтин ситиһиитэ, кыайыыта үксүү турар.
Бу бүтэһик кыайыытын туһунан кини биһиэхэ сэһэргээтэ: «Олунньу 12-18 күннэригэр Санкт-Петербургтан икки чаас айаннаах сиргэ сытар Выборг куоракка норуоттар икки ардыларынааҕы ахсыс төгүлүн ыытыллар «Северные узоры Якутии» көрүү-күрэс быыстапка буолан ааста. Манна Москваттан, Ленинградскай уобаластан, Саха сирин араас муннуктарыттан о.д.а. маастардар кыттыыны ыллылар.
Мин көтөн тиийэр самолетум хойутаан, тэрээһин аһыллыытыгар баттаспатаҕым хомолтолоох этэ. Ол эрэн уруккуттан билэр дьон курдук олус истиҥник көрсөн тоһуйдулар, күүппүттэрин-кэтэспиттэрин биллэрдилэр, турар миэстэбин, остуолбун бэлэмнээн ууран тураллар этэ.
Гостиницабар да тиийбэккэ аэропортан үргүлдьү быыстапкабар элээрдэн тиийэн үлэлэрбин тэлгэтэн, сахалыы таҥаспын таҥнан кэбистим, оһуохайга кыттыстым. Сахалыы таҥаспын таҥнааппын кытары: «Красавица», «Ангел в синем», «Звездочка», «Маечку к нам спустили с небес», «Нежное создание» — диэбит курдук араас мааны тыллар мин аадырыспар кэлэн түстүлэр, хаартыскаҕа хатаатылар, хатаннылар.
Выборг куорат мэра бэйэтинэн кэлэн үлэлэрбин көрдө, сөхтө-махтайда, хайҕаата. Үс күннээх быыстапкаҕа дьон тоҕуоруһа муһунна. Оҕуруону олус сэргииллэр эбит. Улахан үлэлэрбин атыылаһыах баҕалаах да аҕыйаҕа суоҕа. Атыыга диэн кыыс оҕолорго косоплеткалары, баттах киэргэллэрин, брошкалары, браслеттары, ытарҕалары илдьэ барбыппын буолнай ыллылар.
Икки номинацияҕа «Авторская коллекция» уонна «Студия моды» кыттаммын, иккиэннэригэр бастааммын үөрүүм үрдэ суох. Ону тэҥэ Хоту норуотун институтуттан Благодарность, РФ Президенин иһинэн Саха сирин постпредствотыттан Махтал сурук туттум. Онон сылдьыбыт сырыым ситиһиилээх буолла, сыралаах үлэм үрдүктүк сыаналанна.
Тэрээһин үрдүк таһымнаахтык ааста, кытааччыларга олус үчүгэй усулуобуйа оҥороннор өссө ордук астынныбыт. Выборг куоракка «Дружба» гостиницаҕа түһэрбиттэрэ, онно сарсыардааҥҥы уонна киэһээҥҥи аһылык «всё включено», Выборг, Питер куораттар устун экскурсиялар, трансфер барыта киирэрэ. Питерга өссө үчүгэй «Азимут» гостиницаҕа түһэрбиттэрэ. Онно эмиэ сарсыардааҥҥы уонна киэһээҥҥи аһылык «шведский остуол» этэ.
Бу сырыы миэхэ элбэх айымньылаах дьону бэлэхтээтэ, инникитин сайдарбар, күүспэр күүс биэрдэ, өссө үрдүккэ кынаттаата диэхпин баҕарабын.
Ол кэмҥэ оҕолорум эмиэ ситиһиилэнэн ийэлэрин үс бүк үөрдэн күүспэр күүс эптилэр, кынаттаатылар. Уолбут Алмаас Бүлүү куоракка республикатааҕы тустууга чемпион үрдүк аатын сүктэ. Онтон кыыспыт Көмүсчээнэ үҥкүүтүн ансаамбылынан «Северная звезда» международнай фестивальга кыттан бастакы үрдэл, онно тойукка кыттан иккис миэстэ, аны ырыа уонна строй көрүүтүгэр кыттан, иккис миэстэ буолуталаата, уонна соҕотохтуу ГТО-ну үрүҥ көмүскэ туттарда.
Онон биһиги ыал биир нэдиэлэ иһинэн ситиһии бөҕөтүн хомуннубут. Манна барытыгар аҕабыт, кэргэним Семен Андреевич кыһамньыта сытар. Кини миигин өйөөн, оҕолоругар кыһаллан, барыларын тэрийэн, көрөн истэн, туохха да санаарҕаабакка, долгуйбакка, чэпчэкитик сырыттым. Ити курдук үөрүүлээх сонуннарбынан, үчүгэй илдьиппинэн биир дойдулаахтарбын кытта үллэстэбин», — диэн Майя Афанасьевна кэпсээтэ.
Надежда Петрова