Мин аҕам Слепцов Николай Захарович-I 1904 сыллаах төрүөх, үс бииргэ төрөөбүттэртэн иккис уол. Улахан убайа Слепцов Егор Захарович (партком Николай Егорович аҕата), кыра бырааттара Слепцов Николай Захарович-II (Елизавета Николаевна учуутал аҕата). Кинилэр бары Хаһааччыйаҕа төрөөбүттэр. Эбээлэрэ, эһээлэрэ хаһаактар, эһээбит аата Хрестофор, эбээбит Агафья диэннэр эбит.
1929 с. Саха АССР Верховнай Советын уурааҕынан 10 эр киһини, ол иһигэр биһиги аҕабытын, ыраах сытар Лаптев муоратын кытыытыгар кырсаны бултата ыыталлар. Ол саҕана кырса күндү түүлээххэ киирсэн улахан сыанаҕа турара, онон булчуттар дойдубут валютнай фондатын хаҥаппыттара. Кинилэр үксүлэрэ кадровай стахановец булчуттар ааттарын сүкпүттэрэ, Юкагиры аатырдыбыттара.
Сэрии саҕана булчуттар өссө элбэх кырса бултаан былааннарын сүүс, икки сүүс бырыһыан толорбуттара. Уһулуччу ситиһиилэрин иһин сэрии саҕана оройуон бастыҥ булчуттарын 1944 с. кулун тутар 14 күнүгэр “Булт промыслын туйгуна” диэн значоктарынан наҕараадалаабыттара. Кинилэр ааттара — Слепцов Н.Н.-III, Колесов Н.С., Колесов А.С., Слепцов Н.П., Сыроватскай И.Илл., Томскай А.А.-II, Томскай К.И., Лебедев Н.П. уонна Слепцов Н.З.
Аҕам бэйэтэ былаанын 115 бырыһыан толорбут уонна 5535 солкуобайдаах түүлээҕи Ойоҕоско биригэдьиирдии сылдьан бултаан туттарбыт.
Сэрии кэнниттэн, 1948 сыл ыам ыйын 20 күнүгэр, Юкагир олохтоохторо “За доблестный труд в Великой Отечественной войне 1941–1945 гг. ” диэн мэтээлинэн наҕараадаламмыттара, онно эһэм, эбэм, аҕам, маамам испииһэккэ сурулла сылдьаллар.
Бултка кэлбит эр дьон үксүлэрэ бөһүөлэк кыргыттарын кэргэн ылан олохсуйбуттара, мин аҕам эмиэ хаалбыт.
Мин маамам – Слепцова Улита Хрестофоровна 1915 сыллааҕы төрүөх, Юкагирга төрөөбүт, балтылаах, бырааттаах, кини аҕата, биһиги эһэбит Лаптев муоратын кытыытынан түөлбэлээн олорбут омуктартан ордон хаалбыт оҕо үһү, Юкагирга иитиллибит, олорбут, онтон эбэм Абыйтан төрүттээх, кинилэр оҕолоро биһиги – биэспит.
Маамам, эбэм ити бултаммыт кырсалары барытын ыраастаан, сууйан-сотон, куруук инники кирбиигэ сылдьаллара, куруук үрдүк сыанаҕа барарын ситиһэллэрэ, ити кэннэ холкуос бүппэт үлэтэ, мас хайытыыта, саһааннааһын, дьиэ үлэтэ, иистэнии, булчуттары бэрийии – барыта дьахталлар үрдүлэринэн этэ. Маамам общественник, активистка, производственница этэ. Биһиги 1954 с. диэри Юкагирга олорбуппут, онтон аҕам инбэлиит буолан бултаабат буолбута, ол иһин Тумакка көспүппүт. Онтон 1960 сыллаахха Хаһааччыйаҕа кэлэн олохсуйбуппут. Аҕам 1971 с. өлбүтэ.
Кинилэр оҕолоро, биһиги, үлэни өрө туппут дьоммут, ол иһин Николай, Ульяна, Анна – үлэ бэтэрээнэ мэтээллээхпит, Илья уонна Николай – производство туйгуннара этэ.
Анна Слепцова, потребительскай кооперация туйгуна, бэтэрээнэ