Тумат нэһилиэгин биир үлэҕэ дьулуурдаах, үлэһит ыччата Алексей Горохов 2017 сыллаахтан сөбүлүүр дьыалатын ыкса ылсан дьиэ кыылын, көтөрү иитиинэн дьарыктаммыта.
Бастаан Уус-Куйга бөһүөлэгэр сибиинньэ иитиитинэн дьарыктанар Николай Дидораттан үс сибиинньэни атыылаһан, рейсовай вертолетунан Тумакка аҕалтарбыттара. Ол курдук хаһаайыстыбатыгар 18 сибиинньэҕэ диэри элбэтэн баран Юкагир, Казачье, Усуйаана нэһилиэктэригэр, Тумат олохтоохторугар түҥэппитэ. Онтон Дьокуускай куоракка, кэтэх хаһаайыстыбалаах дьонтон сымыыт атыылаһан аҕалан инкубаторга олордон чоппуускалары таһаартаабыта. 60 сымыыттан 80% чоппууска тахсара.
Социальнай харысхал управлениетын көмөтүнэн 240 тыһыынча солк. ылан куораттан хаһаайыстыбаҕа сөптөөх араас матырыйааллары, иһити-хомуоһу, комбикорм сакаастанан уунан, массыынанан Казачьеҕа диэри аҕалтарбыттара.
Бастакы тэринэн эрэр эдэр киһиэхэ бу олус көмөлөөх этэ. Ол кэмтэн ылата индюк, перепелка, дьиикэй хаастары боруобаҕа инкубаторынан таһааран иитэ сылдьыбыта. Билигин 30-ча кууруссалаах. Сибиэһэй сымыыты ылар дьон бааллар.
“Быйыл саҥа дьыл кэнниттэн Усуйаана улууһун тыатын хаһаайыстыбатын управлениетын салайааччыта Артем Артемович Милютин “куораттан комбикорм аҕалтараҕын дуо” диэн ыйыппытыгар сөбүлэһэн биир тонна атыыласпыппытын Казачьеҕа диэри босхо аҕаллылар”, — кэпсиир Алексей.
“А.А. Милютин комбикорм аҕалыытыгар иккис сылын көмөлөһөр, өссө да инникитин сибээспитин быспаппыт буолуо диэн эрэл баар. Куораттан Прокопий Милютин субуотаҕа, олунньу 23 күнүгэр, түүн массыынанан айаннаан баран 26 чыыһылаҕа Казачьеҕа кэлбит.
Ол күн, биһиги дьолбутугар, Тумакка айаннаан эрэр Тумат эр бэрдэ Эдуард Томскайы кэпсэтэн, биир тонна комбикорм миэстэтигэр буор-босхо кэллэ. Дэмэ суох, кууруссалар бүтэһик астарын сиэри олороллор этэ.
Ону таһынан Тумат нэһилиэгэр олорор үтүө санаалаах хоһуун дьоммут Иннокентий Алексеевич Томскай, Октябрь Иванович Горохов уонна убайбыт Валентин Иннокентьевич Протодьяконов хаһаайыстыбабытыгар балыгынан көмөлөстүлэр. Кинилэргэ уонна үөһэ этиллибит дьоммутугар — А.А. Милютиҥҥа, П.П. Милютиҥҥа, Э.Ю. Томскайга, И.А. Томскайга, О.И. Гороховка, В.И. Протодьяконовка биһиги, Гороховтар, ааттарыттан барҕа махталбытын тиэрдэбит. Маннык үтүө дьонноох буолан олохпут тупсан иһэр. Эһиги дьиэ кэргэттэргитигэр дьолу-соргуну, туйгун доруобуйаны, барытыгар ситиһиини баҕарабыт”, — диэн махталларын тириэрдэллэр Гороховтар.
Мирослава Федотова