Бу нэдиэлэҕэ Бүтүн Россияҕа Дьиэ кэргэн, таптал уонна бэриниилээх буолуу күнэ бэлиэтэннэ. 2022 сылтан бу бэлиэ күн государственнай бырааһынньык быһыытынан киирбитэ.
Депутатскайдааҕы «Металлург» культура дьиэтигэр Дьиэ кэргэн, таптал, бэриниилээх буолуу күнүгэр анаммыт тэрээһин буолан ааста. Дьоро киэһэ кэмигэр ыытааччы Евгения Плюснина бу күн историятын туһунан кэпсээтэ, Петр уонна Февронья Муромскайдар олохторун сырдатта.
Ыаллар икки ардыларыгар ыытыллыбыт күрэххэ Климовскайдар бастакы миэстэҕэ тигистилэр. 2 миэстэни Даниловтар ыллылар, онтон 3 миэстэ — Аммосовтар дьиэ кэргэннэрэ.
Маны таһынан, үөрүүлээх быһыыга-майгыга бочуоттаах ыалдьыттары – Лидия уонна Иннокентий Портнягиннары – чиэстээһин буолла. Кинилэр быйыл кыһыл көмүс сыбаайбаларын – илии-илииттэн ылсан, сарын сарынтан өйөнсөн, алаһа дьиэ тэринэн 50 сыл бииргэ олорбуттарын бэлиэтииллэр.
Л.И. Портнягина кылгастык маннык кэпсиир:
“Мин, Лидия Ивановна Портнягина (Слепцова) 1952 сыллаахха Усуйаана оройуонун Тумат бөһүөлэгэр Анна Гаврильевна уонна Иван Васильевич Слепцовтар дьиэ кэргэннэригэр төрөөбүтүм.
Кэргэним Иннокентий Иннокентьевич Хаһааччыйа бөһүөлэгэр 1952 сыллаахха Иннокентий Иванович уонна Вера Ивановна (Шадрина) Портнягиннар дьиэ кэргэннэригэр төрөөбүтэ.
Биһиги бииргэ Хаһааччыйа орто оскуолатыгар үөрэнэн 8 кылааһы бүтэрэн үөрэххэ барбыппыт. Кеша механизатор үөрэҕин, мин атыы-эргиэн үөрэҕин бүтэрэн, Хаһааччыйаҕа кэлэн 1974 сыл от ыйыгар ыал буолбуппут. Иккиэн “Холбос” тэрилтэтигэр Хаһааччыйа Райпотугар эдэр бэйэбит биэнсийэҕэ барыахпытыгар диэри үлэлээбиппит. Үс оҕолоохпут, 8 сиэннээхпит, 2 хос сиэннээхпит. Уолбут Кеша Депутатскайга олорор, үлэлиир. 1 кыыс оҕолоох, 2 уол сиэннээх. Улахан кыыс Анна — кондитер, иистэнньэҥ идэлээх, 3 уол оҕолоох, Дьокуускай куоракка олорор. Кыра кыыс Дуня психолог-педагог идэлээх, билигин иккис идэтинэн парикмахер-мастерынан үлэлиир. Дьокуускайга олорор. 3 кыыс, 1 уол оҕолоох.
Бу сыл от ыйыгар биһиги бииргэ олорбуппут 50 сыла буолла. Ону чиэстээбиттэрин долгуйан туран Депутатскайдааҕы “Металлург” культура дьиэтин коллективыгар, чуолаан директор Елена Егоровна Гороховаҕа, барҕа махталбытын тиэрдэбит. Үлэҕитигэр ситиһиини, кытаанах доруобуйаны, уһун дьоллоох олоҕу баҕарабыт!»
Мирослава Федотова