Биллэрин курдук, быйыл Улуу Кыайыы үбүлүөйдээх 80 сылын бэлиэтиибит. Манан сиэттэрэн төрөөбүт дойдубут чиэһин көмүскүү сылдьар анал байыаннай дьайыы кыттыылаахтарын өйөөн уонна Аҕа дойду Улуу сэриитигэр олохторун толук уурбут буойуттары хорсун-хоодуот быһыыларын ытыктаан, сүгүрүйэн туран 2025 сылы Дойду президенэ В.В. Путин Аҕа дойдуну көмүскээччи сылынан уонна Саха сирин Ил Дархана А.С. Николаев Ийэ дойдуну көмүскээччи сылынан биллэрбиттэрэ.
Бу Ийэ дойдуга таптал уонна Аҕа дойдуга эрэллээх буолуу, биһиги кэммитигэр анал байыаннай дьайыы кыттыылаахтарыгар уонна биһиги өбүгэлэрбит хорсун быһыыларын, араас историческай кэмҥэ сэриилэспит, дойду куттала суох буолуутугар туруулаһааччыларга ытыктабыл уонна үүнэр көлүөнэҕэ эппиэтинэс буолар.
Бу сыллар устата анал байыаннай дьайыы кыттыылаахтарыгар дойдубут үрдүнэн күүс-көмө өйөбүл буоларга аналлаах араас акциялар, тэрээһиннэр, дьаарбаҥкалар, харчынан көмөлөр ыытылыннылар. Биһиги Тумаппыт нэһилиэгин амарах сүрэхтээх дьоно-сэргэтэ, оҕолоро, тэрилтэ үлэһиттэрэ бу суолтан туора туран хаалбакка бары түмсэн анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэ тураллар.
Олунньу 22 күнүгэр киэһэ 7 ч. «Түмсүү» култуура дьиэтигэр «Арассыыйа киэн туттуута уонна албан аата» патриотическай эҕэрдэ кэнсиэр буолан ааста. Долгутуулаах дьоро киэһэбитин — быйылгы сылбыт арыллыытын олохтоох дьаһалта баһылыга Василий Лебедев эҕэрдэ тыллардаах, үөрүүлээх быһыыга-майгыга арыйда.
Кэнсиэрбит “Моряктар” үҥкүүлэринэн саҕаланна. Кыттыыны ыллылар: культура туйгуна, олохтоох автордар ырыаларын тарҕатааччы Мирон Константинов, уус-уран самодеятельность актыыбынай кыттааччыта Аэлита Колесова; култуура үлэһиттэрэ: Мичил Томскай, Туяра Бубякина ; “Туналы хотун” уонна биир сыллааҕыта саҥа тэриллибит “Чэлгийэ” дьахталлар ансаамбыллара уонна оскуола үөрэнээччилэрэ.
Оҕолор дьоһуннук туттан туран нууччалыы Аҕа дойду көмүскээччилэрин, Аармыйа туһунан ырыалары доргуччу толорон көрөөччүлэр астына-дуоһуйа көрдүлэр. Оттон Лариса Тоскина Константин Симонов аатырбыт “Жди меня” хоһоонун ааҕыыта дохсун ытыс тыаһынан доҕуһуолланна. Итиэннэ үҥкүүһүт кыргыттар толорууларыгар “Смуглянка” үҥкүү, ордук “Военнай” үҥкүү сонун көстүү буолла, биһирэннэ.
Сыл устата элбэх үгүс тэрээһиннэр, дьоро киэһэлэр дьоммутун-сэргэбитин сэргэхситиэхтэрэ, үлэҕэ, сырыыга кынаттыахтара турдаҕа.
Елизавета Горохова, Тумат н.