Саха Республикатын Ил Дархана Айсен Николаев ыйааҕынан Россия норуоттарын, култуураларын үйэлээх духуобунай баайын, саха төрүт үҥкүүтүн — оһуохайы харыстыыр уонна тарҕатар соруктаах сыалтан Оһуохай күнэ 2023 сыл ыам ыйын 25 күнүгэр биллэриллибитэ. Онон сибээстээн, Усуйаана нэһилиэгэр, С.В. Горохов аатын сүгэр оскуола спортзалыгар учууталлар, үөрэнээччилэр, нэһилиэк олохтоохторо уонна “Кэскил” култуура дьиэтин үлэһиттэрэ саха төрүт үҥкүүтүгэр — оһуохайга көхтөөх кыттыыны ыллылар. Бу маннык маассабай тэрээһини бастакытын бэлиэтээтибит.
Бу үөрүүлээх күнү эҕэрдэ тылларынан историятын билиһиннэрэн арыйдылар Татьяна Мярина, Матрена Попова. Саха омук саамай тэнийбит, дьону түмэр былыргыттан кэлбит бастыҥ үҥкүү буолар. Хоһоон, ырыа уонна үҥкүү тэҥҥэ толоруллаллар. Сиэри -туому тутуһууну кытта ситимнээх. Элбэх киьи эргимтэҕэ туран анал хатыланар хамсаныылары оҥоро-оҥоро уонна ыллыы-ыллыы күн хоту эргийэллэр.
Ол курдук оһуохай тылын этэн дуораттылар Диана Батюшкина, Ольга Горохова, Ирина Слепцова, Динара Батюшкина, тэрийиигэ көмөлөстө Туяра Колодинская.
Бары үтүөнү, ситиһиини биир дойдулаахтарбытыгар!
Матрена Попова