Ааспыт нэдэлиэҕэ Тумат нэһилиэгиттэн “Түмсүү” культура дьиэтин үлэһиттэрэ уонна уус-уран самодеятельность кыттыылаахтара Депутатскайга, Хаһааччыйаҕа, Усуйаанаҕа “Сааскы бэлэх” диэн ааттаах кэнсиэрдээх хостуруоллаан, дьону сэргэхситэн, үөрдэн-көтүтэн барбыттара. «Түмсүү” КДь директора, СӨ культуратын туйгуна Андриян Горохов бу туһунан кылгастык кэпсээтэ:
“Бастакы былааммыт быһыытынан биһиги “Тиэтэйбит” испиктээкиллээх кэлиэхтээх этибит, ону сүрүн оруоллары толорор артыыстарбыт куоракка күрэххэ бараннар, «Көр-нар уопсастыба» мини-театр, уус-уран самодеятельность кыттыылаахтара — барыта 15 киһи буолан вертолетынан көтөн кэлбиппит.
Кэнсиэрпит культура үлэһиттэрин күнүгэр анаан буолуохтаах этэ, ол эрээри Москваҕа “Крокус Сити Холлга” буолбут терактан сылтаан, буолар күнүн көһөрөн биэрбиппит. Бириэмэлээх буоламмыт биир күҥҥэ Депутатскай бөһүөлэк краеведческай музейыгар сырыттыбыт, көрдүбүт, онтон киэһэтигэр кырдьаҕастар уонна инбэлииттэр интернат-дьиэлэригэр ыалдьыттаан кэнсиэр көрдөрдүбүт. Интернат олохтоохторо олус үөрдүлэр-көттүлэр, уйадыйан харах уулаах махтана хааллылар.
Хостуруолбут тэрээһинигэр улууспут баһылыгын солбуйааччылара Сергей Игнатьев уонна Ньургуяна Босикова улахан өйөбүлү оҥордулар, барарбытыгар-кэлэрбитигэр көмөлөстүлэр. Онон кинилэргэ барҕа махталбытын тиэрдэбит. Аны Усуйаанаҕа, Хаһааччыйаҕа кэнсиэрдээн баран Тумакка төннөбүт.
Уонна улууспут олохтоохторун, биир дойдулаахтарбытын муус устар 12-14 күннэригэр Тумакка буолар улуустааҕы спартакиадаҕа ыҥырабыт, барыгытын кэтэһэбит», — диэн кэпсээнин түмүктээтэ.
Надежда Петрова