Суос-соҕотох күнү көрдөрбүт күндү оҕобун сүтэрбит ийэ аһыыбын хараҕым уутунан сууммутум сылтан орто.
Мин оҕом Иванов Григорий Олегович Өлөөн улууһун Өлөөн бөһүөлэгэр 1983 сыллаахха от ыйын 10 күнүгэр күн сирин көрөн, миигин Ийэ үрдүк аатын сүктэрбитэ. Бастакы тииһэ, бастакы “мама” диирэ, бастакы хардыыта күн бээһээ курдук өйбөр хатанан хаалбыттар.
Оҕом иккитигэр мин төрөөбүт сирбэр көһөн кэлбиппит. Детсадка, оскуолаҕа манна киирэн үөрэнэр. Оҕо-оҕо курдук барыны бары интэриэһиргээн, ол быыһыгар бултаан, балыктаан үөрэн-көтөн аҕай кэлэр буолара. Депутатскайга 2001 сыллаахха улахан авария буолан Силээннээххэ баран үөрэммиттэрэ. Убайын Андрейы кытта онно оскуоланы 2002 сыллаахха бүтэрбиттэрэ.
Оскуола кэнниттэн газоэлектросварщик үөрэҕин бүтэрэн баран, таптыыр дьарыгын таба таарыйан үчүгэй сварщик аатыран барытыгар иннинэн сылдьара. Кэлин кэргэннэнэн, икки уол сиэн бэлэхтээн, эбээ буолар дьолу билбитим. Көмүс уҥуохпун көтөҕөр киһилээхпин, оҕом этэҥҥэ сылдьар диэн испэр төһөлөөх үөрэрим, таҥараҕа махтанарым эбитэ буолуой, ону ийэттэн атын ким билиэ баарай…
Григорий байыаннай билиэтигэр «в запасе» диэн суруктаах этэ, кини «всегда хотел служить» диэн этээччи. Онтон ити хара дьайдаах СВО саҕаланан бастаан ииппит уолум Андрей мобилизацияҕа түбэһэн барбыта. Онуоха убайа барбытыгар уолум “мин тоҕо манна олоруохтаахпыный” диэн, миэхэ эппэккэ даҕаны, баҕа өттүнэн илии баттаан, барара бу кэлбитигэр миэхэ эппитигэр соһуйан эрэ хаалбытым. Ол 2022 сыл алтынньыта этэ.
Күн тура-тура үҥэн, бүгүн күннээххэ оҕом сибээскэ таҕыстар диэнинэн эрэ олорор күннэрим үүммүттэрэ. Бастаан артиллерияҕа разведчигынан, онтон “Град” диэҥҥэ кыра отделение командирынан сылдьабын диэн этэрэ. Иккитэ уоппускаҕа кэлэ сылдьыбыта.
Балаҕан ыйын 3 күнүгэр барбыта, барарыгар: “Мама, прошу уважать мой выбор, я выбираю путь защитника, если что наһаа айманымаар” — диэбитэ. Онтон алтынньы 29 к. 2023 с. суруйбута: “Мама, мы прикомандированы к 394-му полку пехотно-штурмового отряда. Чисто мужская работа, ходим в атаки”. Ол кэмтэн ыла сибээспит бүппүтэ. Оҕом барахсан кырамтата да көстүбэтэ, бу биир сыл тухары утуйар уум көтөн, саныыр санаам ыһыллан, харах уута эрэ доҕордонон күммүн-дьылбын да умнуохча буолан сылдьабын…
Уолбун кытары бэйэм бииргэ төрөөбүт эдьиийим Нина эрдэ бу сиртэн баран, кини икки уолун 1991 сыллаахха иитэ ылбытым. Кыра уол Андрей аҕыстааҕа, убайа Ваня 14 саастаах этэ. Үс уолланан эппиэтинэс бөҕө эбинэн, уолаттарбын үһүөннэрин хам тутан оскуолаларын бүтэртэрбитим.
Андрей эмиэ Өлөөн улууһугар муус устар 21 күнүгэр 1983 сыллаахха күнү көрбүтэ. Оҕо сааһа Депутатскайга ааспыта. Толору аата Костицын Андрей Сергеевич. Армияҕа 2006-2008 сс. сулууспалаабыта. Өссө контрагынан баран 2009-2010 сылларга сулууспатын салҕаабыта.
Оҕом Андрей Жанна диэн кыыс оҕолоох, СВФУ студентката. Кэргэнэ Наталья Спартаковна “Андрей на все руки мастер этэ” диэн ахтар, ол курдук профессията да элбэҕэ — медник, водитель, электрик, сварщик этэ. Оҕом барахсан миэхэ улахан көмөлөөх этэ, кини чугас олорор буолан туох баарбын барытын оҥороро, ситэрэрэ.
2022 с. алтынньы 6 күнүттэн, СВО саҕаланыаҕыттан, мобилизацияҕа түбэһэн барбыта. Тапталлаах кэргэнэ Наталья Спартаковна Владивостокка атаара бара сылдьыбыта, Андрей Ростовка көтүөр диэри.
Хара ааныттан штурмовой ротаҕа, передовойга сылдьан эмиэ 394 полкаҕа сыһыардылар диэн суруйбута (2023 сыл сэтинньи 30 күнүгэр). Ол онтон эмиэ сибээспит быстыбыта. Былырыын ахсынньы иккис күнүгэр суох буолбутун ирдэһэн-ирдэһэн, дойдутугар Силээннээххэ аҕалан кистээбиппит.
Оҕом Андрей суох буолбутун истэн бииргэ передовойга сылдьыбыт саллаат доҕоро Женя ПТУрщик маннык суруйбута – “Не верю, что Андрей погиб, потому что не видел людей сильнее, храбрее и отважнее его. Сколь ходил с ним на штурмы, Андрей всегда выходил победителем в стрелковых боях и в рукопашных схватках, что он может погибнуть только от снаряда или от пули снайпера. В бою его не смогли бы победить”. Ол курдук оҕом барахсан снарядка түбэспит диэн этэ.
Оҕолорбун санаабатах күнүм суох, “мама, я жив-здоров” диэн эрийиэхтэрэ диэн күн аайы кэтэһэбин.
Оҕолорбун сүтэрэн тумаҥҥа муммут күннэрбин ханнык да ийэ хатылаабатын, мин курдук кырдьар сааска өйөнөр өһүөтэ суох туран хаалымаҥ, оҕочоотторум-кынаттарым сибээскэ суох буолбуттара сылларын туолуута ахтан-санаан аастаҕым буоллун диэн бу суруйдум… Баалаамаҥ дуу, көстөн ааһыҥ саатар түүлбэр…
Күрэммиттии күрэнимэҥ,
Күүтүөм өрүү ас астаан,
Кэтэһэн олоруом түннүкпэр
Кэлэн ааһар дьон быыһыгар
Күлүккүтүн көрүөм диэн…
Маргарита Аммосова