Хатыҥ чараҥ быыһынан
Хатыҥ чараҥ быыһынан
Аа дьуо хааман ааспытым,
Үрүҥ күммэр махтанан,
Оргууй үөһээ тыыммытым.
Сарсыардааҥы сарыалга
Сииктээх окко суунаммын,
Сибэккилээх хонууга
Сэрэнэммин мин киирдим.
Дьирибиниир тойуктаах
Ырыа чыычаах көрүстэ,
Дьикти иэйии кэһиилээх
Самаан сайын ортото.
Сып-сылаас салгыннаах,
Сымнаҕас тыал сипсийэр,
Дьэдьэн ото амтаннаах,
Чэбдик салгын имэрийэр.
Кыайыы кынаттаах эргиллээр
Бүгүн мин манна көрүстүм,
Биир саллаат үөрэппит оҕобун,
Дойдутун көмүскээн охсуспут,
Дьоһуннаах буойун эр бэрдин.
Кылгас да кэмҥэ көрсүһэн,
Сүрэҕим үөрүүттэн долгуйда,
Этимэ тугу да, доҕоччуок,
Көстөр барыта хараххар.
Олох уорааннаах долгунун,
Олус да уустук кэмнэрин,
Тулуйан, тутуһан бу кэллиҥ,
Түбүктээх күннэри ааһаҥҥын.
Киэн тутта көрөбүн хотойбун,
Кыргыһыы күүстээх буойунун,
Күүскэ да күүскэ кууһабын
Кыайыыга кынаттыыр боотурбун.
Бу курдук куруутун эргиллээр,
Өрүүтүн долгуйа мин күүтүөм,
Алгыстаах аартыккар туруоҕум,
Ахтар Айыыһыккар сүгүрүйэн,
Кыайыы кынаттаах эргиллээр,
Көҥүл, дьол олоҕун буойуна,
Көрсүһүү үөрүүтүн бэлиэтээн,
Күөх сааһы уруйдуу туойуохпут.
***
Мип-минньигэс киһичээн,
Кып-кыракый сиэнчээним,
Илиилэрин даллатан,
Тооторуйа сүүрээхтиир,
Күндү көмүс туорааҕым,
Күлэр-үөрэр туллугум,
Күннүүн сырсар сардаҥам,
Кэлиий миэхэ, күнчээним.
Чуопчаарыйар куоластаах,
Чуораанчыктыы лыҥкыныыр,
Чоҕулуччу көрөөхтүүр,
Чыыбы-чыыбы чыычааҕым.
Эбээ, эһээ доҕоро,
Эйэргэһэр сэгэрбит,
Эдэрбитин эргитэр
Эриэккэс да эбиккин.
Махтана саныыбын
Субу баардыы өйдүүбүн,
Ол ааспыт дьикти түгэни,
Учуутал аатын сүгэммин,
Билии кыһатыгар кэлбитим,
Олустук долгуйан тураммын,
Улуу храм аанын аспытым,
Сырдыык — сырдык кылааска
Сэрэнэммин ааспытым.
Чоҕулуспут харахтар,
Тургутардыы көрөллөр,
Билии — көрүү аартыгар
Бииргэ барсыах курдуктар
Күндү көмүс биэбэйдэрим,
Мин үөрэппит оҕолорум,
Көр-күлүү аргыстаах,
Мэник-тэник доҕотторум.
Сыллар, күннэр усталлар,
Ааһар былыты санатан,
Тиһэх чуораан лыҥкыныыр,
Аргыыйдык вальска ыҥырар.
Оҕолорум — туллуктарым,
Алгыстаах аартыкка көтөллөр,
Онтон мин атаара хаалабын,
Ахтар Айыыһыттан көрдөһөн,
Тумаҥҥа мунан хаалбакка
Тулуйан, туруулаһан,
Тоҕойдору этэҥҥэ туораан,
Толору дьон буолаарыҥ диэн,
Кэм кэрдии ааһара түргэнин,
Тиһэх биэтэккэ кэлэммин,
Куруутун махтана саныыбын
Учуутал буолбут дьылҕабар.
Розалия Горохова