Уһук Хоту Усуйаана улууһугар, Хаһааччыйа орто оскуолатыгар 2012 сыллаахтан дьүкээгир омук төрүт культуратын, тылын, литературатын үөрэтэр «Эдьил Йаwул («Школа жизни») бырайыак ситиһиилээхтик үлэлээтэ. Бу бырайыак чэрчитинэн, “Йанги» диэн үҥкүү бөлөҕө тэриллэн үлэлээбитэ номнуо 10 сыл буолла. Оҕолору үҥкүүгэ уһуйар салайааччылара Лаурика Дохунаева, омук тылын учуутала, оскуолаҕа үөрэх чааһыгар дириэктэри солбуйааччы.
Айылҕаттан талааннаах үҥкүүһүт Лаурика Евгеньевна үҥкүүгэ уһуйбут кырачаан оҕолоро быйыл 10, 9 кылаас буола улааттылар. «Йанги» оҕолоро сылын аайы Бүтүн Арассыыйа, өрөспүүбүлүкэ, улуус таһымнаах араас күрэхтэһиилэргэ ситиһиилээхтик кытталлар. Ол курдук, саҥа үүммүт 2024 сыл саҕаланыытыгар Кытай норуодунай өрөспүүбүлүкэтигэр Удаляньчи куоракка I аан дойдутааҕы Кытай — Россия «Плечом к плечу» фестивалыгар ситиһиилээхтик кыттан кэллилэр. Бу улахан таһымнаах күрэхтэһиигэ 600-тэн тахса оҕо, эдэр ыччат кыттыыны ылбыт.
Оҕолор улахан сыанаҕа аан бастаан тахсан, олус долгуйбуттар. Көрөөччүлэр дохсун ытыс тыаһынан арыаллаан үөрдүбүттэр, оҕолорбут үҥкүүлэрин, талааннарын көрөн олус сөхпүттэр, сөбүлээбиттэр. Дьүүллүүр сүбэ түмүгүнэн, «Йанги» үҥкүү бөлөҕө I степеннээх Лауреат буоллулар.
Кытай сиригэр айанныыр бырайыастарын төлөөбүт, улахан сыанаҕа тахсар таҥастарын-саптарын барытын тэрийбит күндү төрөппүттэргэ, Кытай сиригэр — уотугар тэҥҥэ арыаллаабыт, көмөлөспүт күн-күбэй ийэлэргэ Алия Слепцоваҕа, Прасковья Гороховаҕа, Хаһааччыйа орто оскуолатын директорыгар М.С. Окороковаҕа махтаналлар «Йанги» оҕолоро уонна салайааччы Дохунаева Л. Е.
Хотугу норуот историятын, төрүт култууратын утумнаахтык үөрэтэр, оҕо айар талаанын, дьоҕурун сайыннарар үлэни мэлдьи көҕүлээн ыытар Хаһааччыйа орто оскуолатын учууталларын, оскуола директора Маргарита Степановнаны саҥа үүммүт сылга улахан түһүлгэҕэ кыттан, Лауреат үрдүк аатын ылбыккытынан истиҥник эҕэрдэлиибит. Ситиһии кынаттаах аартыккыт алгыстаах буоллун, айар үлэҕит уота өссө күүскэ саҕыллан, үрдүктэн үрдүк чыпчаалларга, саҥа саҕахтарга угуйа-ыҥыра туруохтун!
Розалия Горохова