Биһиги, Лидия Ивановна уонна Иннокентий Иннокентьевич Портнягиннар, 1974 сыллаахха от ыйын 12 күнүгэр Усуйаана оройуонун Хаһааччыйа сэлиэнньэтигэр дьиэ кэргэн регистрациятын туоһулуур киниискэни туппуппут. Онтон ыла бииргэ олорбуппут 50 сыл ааста.
Хаһааччыйаттан ханна да халбаҥнаабакка, “Холбос” линиятынан Райпоҕа отучча сыл үлэлээн, советскай потребительскай кооперация туйгуна, үлэ ветерана буолан, үс оҕону төрөтөн, улаатыннаран, 8 сиэн, 2 хос сиэн эбэтэ, эһэтэ буолан олорон кэллибит.
Биһиги үлэлээбит, олорбут сирбитигэр Хаһааччыйаҕа атырдьах ыйын 10 күнүгэр бииргэ үөрэммит, үлэлээбит, бииргэ алтыспыт уонна уруу-аймах дьоммутунаан олорбуппут 50 сыллаах юбилейын үөрэ-көтө бэлиэтээтибит.
Нэһилиэк эдэр ыччата олус көхтөөхтүк, ис дууһаларыттан биһиэхэ юбилейы атаарарга төһүү күүс-көмө буоллулар. Ол курдук, чуолаан бэлиэтиэхпин баҕарабын женсовет бэрэссэдээтэлэ Кладкина Валерия Александровнаны, культура үлэһитэ Горохова Алена Михайловнаны, Горохова Надежда Геннадьевнаны, Левина Пелагея Егоровнаны, Барабанская Евгения Егоровнаны, Куличкина Надежда Семеновнаны, Бубякина Люция Ивановнаны.
Бу эдэр ыччаттар бырааһынньык туох баар оформлениетын, киэргэтиитин, иилээн-саҕалаан салайан ыытыытын, аһыгар-үөлүгэр барытыгар көмөлөһөн, олус көрдөөх-нардаах программалаах ыыттылар. Маны таһынан биһиэхэ чугас дьоммут, бииргэ алтыһар Горохова Ирина Николаевна, Николаев Михаил Гаврильевич, Колесова Елена Николаевна, Слепцов Иван Андреевич күүс-көмө буоллулар.
Бары көмөлөспүт ыччаттарбытыгар ити курдук көхтөөх буолуҥ, кырдьаҕастары хаһан да умнумаҥ, куруук убааастааҥ, бу курдук өрө күүрүүлээхтик үлэлии-хамныы сылдьыҥ диэн этиэхпит этэ. Барыгытыгар кытаанах доруобуйаны, уһун үйэни, элбэх үөрүүнү-көтүүнү, үлэҕитигэр ситиһиини, дьиэ кэргэҥҥитигэр дьолу баҕарабыт. Ис сүрэхпититтэн долгуйан туран барыгытыгар махтанабыт.
Лидия, Иннокентий Портнягиннар