Усуйаанаттан Дьокуускай куоракка көhөн барбытым номнуо 2 сыл буолла. Арктическай мобильнай биригээдэ састаабыгар үлэлээн, элбэх хоту оройуоннарын кэрийдим.
Бу сыл Саха сиригэр оҕоҕо анаммыт буолан элбэх детскай биригээдэ араас хоту оройуоннарыгар үлэлии бардылар. Ол курдук, төрөөбүт дойдубар мин иккистээн кэлэн бардым. Биригээдэбитигэр 14 медик баар буолар, олортон 12 быраас, 2 сиэстирэ.
Биhиги үлэбит сурун сыала — нэһилиэнньэ сүүс бырыһыанын хабан медицинскэй осмотрдары ыытааһын. Командировкабытыгар үксүн 2 нэдиэлэ бэриллэр, сарсыардаттан киэhээҥҥэ диэри үлэлиибит. Ол эрэн ким хайдах доруобуйалааҕын, диагнозтааҕын манна суруллара көҥүллэммэт.
Үлэлиир, олорор усулуобуйабыт, аhылыкпыт хас улуус аайы араас буолар. Биллэн турар, барыта үчүгэй буолбат, туспа ураты ыарахаттардаах буолар. Ол эрэн мин дойдубун коллегаларым олуhун сөбүлээтилэр, хайҕаатылар уонна астыннылар.
Куораттан көтөн кэлээт бастакынан Юкагирга көппүппүт. Юкагирдар хас кэллэҕим аайы үчүгэй баҕайытык көрсөллөр. Саамай ыраах нэhилиэнньэ диэтэххэ, остуоллара куруук толору астаах-үөллээх буолар.
Онно сырыттахпытына блогер-миллионник Богдан Булычев уонна пешеходница Марина Галкина бэйэлэрин хамаандаларын кытары кэлэн барбыттара. Итинник легендарнай, биллиилээх дьону эмискэ көрсөр диэн олус бэртээхэй буоллаҕа. Хаартыска бөҕөҕө кинилэрдиин түhэн, илии тутуhaн, кэпсээн элбэҕин истэн астыммыппыт аҕай.
Киэhээ өттүгэр олохтоох эдэр ыччаттары кытары көр-күлүү, үҥкүү-битии биэчэрэ буолбута.
Бу курдук биhиги туспутугар сүүрбүт-көппүт, ас астаабыт, барытын тэрийбит Светлана Иннокентьевна Пестереваҕа, Күннэй Сергеевна Слепцоваҕа, Прасковья Борисовна Мырееваҕа, Софья Спиридоновна Суздаловаҕа, Айталина Федоровна Устиноваҕа, Анастасия Ильинична Брагинаҕа барҕа махталбын тиэрдэбин!
***
Тумакка бастакы кэлиибитигэр Сардаана Семеновна, Юрий Алексеевич Томскайдарга бары түспүппүт. Сардаана Семеновна баай остуоллаах минньигэс аhынан, сылаас дьиэтигэр көрсүбүтэ.
Ону таhынан барарбыт саҕана хас биирдии бэйэбитигэр балык бэрсэн ыыппыта. Сардаана Семеновнаҕа уонна Юрий Алексеевич Томскайдарга улахан махтал буолуохтун.
Иккис кэлиибитигэр Аграфена Семеновна Томская бэйэтин дьиэтигэр олордубута. Аграфена Семеновна эмиэ ынырык элбэх астаах көрсүбүтэ. Дэмэ суох кырдьык, аҥардас биир аhылыкка уонтан тахса араас бүлүүдэлээх этэ. Ол ас барыта харахпытыгар көстөр билигин. Сотору-сотору Аграфена Семеновна остуолугар баар буола түспүт киhи баар ини диэн санаан ылабыт.
Ону таhынан бэйэм коллегаларбар Екатерина Дмитриевна Томскаяҕа уонна Елизавета Афанасьевнаҕа, бары балыыha үлэhиттэригэр Евдокия Александровнаҕа, Фекла Сидоровнаҕа, Любовь Степановнаҕа махталым муҥура суох! Кинилэр баар буолан үлэбит ситиhиилээхтик түмүктэннэ.
Ону таһынан, элбэх оҕолоох ыал ийэтигэр Алия Болтуноваҕа уонна Тумат эр дьонугар — биhигини барыбытын ичигэстик таҥыннаран, “бураан” көлөлөрү булан, тэрийэн ыстаадаҕа илдьэн табалары көрдөрбүттэригэр махтанабын! Сымыйалаабакка эттэххэ, дойдум табаларын илэ харахпынан саҥа көрдүм, олус үөрдүм.
Уопсайынан даҕаны, Тумат олохтоохторо наhaa үчүгэй дьон, куруук кэлбит-барбыт ыалдьыты наhаа үчүгэйдик көрсөн атаараллар диэн урут-уруккуттан биллэр. Туматтарбар барҕа махтал буолуохтун!
***
Хаһааччыйаҕа бастакы күммүтугэр бэйэбит хамаанда тэринэн, спортзалга баран волейбол оонньообуппут. Сатаан оонньообот да буолларбыт, барытыгар түhүнэн иhэрбитинэн маладьыастарбыт. Олохтоох волейболисткалар оонньуу кэнниттэн тоҥ балыгынан күндүлээбиттэрэ, “эhиги кэлэргитин билбит курдук”, — диэн күлсэллэрэ.
Сарсыныгар туматтар концертарыгар түбэспиппит, оройуон иhигэр гастроллуу сылдьар этилэр. Олус дуоhуйа, астына сынньанан кэлбиппит.
Хаһааччыйаҕа саамай махталбыт диэн поварбытыгар Татьяна Аммосоваҕа. Сып-сап хамсанан, минньигэс ас арааһын астаан аhaппыта аҕай. Сарсыардаттан хойуккуга дылы үлэлиир буоламмыт, бэлэм ас аhыыр биhиэхэ олус көмө буолар.
Бу манна сылдьан дьүkээбил уотун көрөн олус астыммыппыт. Коллегаларым улахан аҥаардара олохторугар саҥа көрбүт буолан, үөрүү уонна хаартыскаҕа түhүү бөҕө этилэр.
Барар күммүтүгэр Татьяна балык заводугар — «Факторияҕа» илдьэ сылдьыбыта. Онно маҕаhыын үлэhиттэрэ быраастарга босхо биир брикет күндүөбэй, 1 толору пакет копченай балык бэрсибиттэрэ, олус диэн үөрбүппүт, бары үллэстэн дьоммутугар кэhии илдьиммиппит.
Ону тahынан Татьяна биhиэхэ индигирка салааты оҥорорго балыгы хайдах кыһарга мастер-класс көрдөрбүтэ. Хас биирдии бэйэбит телефоммутугар видеоҕа устаммыт өйдүү-саныы, көрө сылдьыахпыт.
Татьяна элэккэй, боростуой, бэhиэлэй киhи буолан тута барыбытыгар сүрэхпитигэр киирбитэ.
***
Депутатскайга кэлэн коллегаларбын шашлыктыыр сиргэ уонна бассейҥҥа илдьэ сырыппытым. «Маннык үчүгэй дойдуттан тоҕо көһөн барбыккыный?!», — диэн сөхпүттэрэ.
Түгэнинэн туһанан, “Дьааҥы саһарҕата” хаһыат редакциятын үлэһитигэр Ярослав Цукановка бириэмэ булан эргэ бөһүөлэккэ кыра экскурсия көрдөрбүтүгэр барҕа махталбытын ыытабыт!
***
Хас биирдии бэйэбит бары оҕолордоох-уруулардаах дьон буоллахпыт, оҕолорбутун, дьиэбитин-уоппутун ахтарбыт-суохтуурбут ханна барыай. Ити курдук үлэ быыhыгар араас мероприятиеҕа түбэстэххэ бириэмэ түргэнник барар курдук. Бу курдук сылаастык көрсөн атаараллара биhиэхэ өрүү сүрэхпитигэр хаалар. Санаабыт, турукпут көтөҕүллэр, үлэлииргэ даҕаны чэпчэки буолар. Кэлин саныырга да үчүгэй.
Тус бэйэм ааппыттан уонна коллегаларым ааттарыттан дойдум дьонугар барҕа махталбын тиэрдэбин. Барыгытыгар дьолу-саргыны, кытаанах доруобуйаны, уhун дьоллоох үйэни!
Биhиги туспутугар сүүрбүт-көппүт дьоммутугар медицина араас өттүттэн консультация наада буоллаҕына, туох кыалларынан көмөлөһүөхпүт диэн эрэннэрэбит.
Мария Олесова, мобильнай биригээдэ бырааһа