Анал байыаннай дьайыыга сылдьар уолаттарбытын уонна кинилэр дьиэ-кэргэттэрин өйүүргэ анаммыт аһымал акциятын иһинэн ыытыллыбыт тэрилтэлэр холбоһуктаах концердарын түмүктүүр тэрээһин элбэх киһини түмтэ.
Россия күнүгэр анаммыт гала-концерт көрөөччүлэр истиҥ сыһыаннарынан бигэнэн, биһириир хаһыыларынан арыалланан бэрт сэргэхтик ааста. Түмүк тэрээһиҥҥэ бииртэн биир чаҕылхай нүөмэр талыллан чахчы да күүстээх концерт буолла. Олус да талааннаах дьонноох эбиппит диэн киэн туттуу иэйиитигэр куустардыбыт. Бу элбэх тэрилтэни түмпүт, саҥа талааннары арыйбыт үтүө тэрээһин идеятын этэн биэрбит, элбэхтэ сүбэлээбит убаастыыр учууталбытыгар, СР культуратын үтүөлээх үлэһитигэр Анна Митрофановна Федороваҕа, үҥкүүлэри туруорбут, ырыалары бэлэмнээбит, сценкалары сүбэлээбит культура бары үлэһиттэригэр махтанабыт. Уопсайа бу аһымал акциятыгар 1400000 тахса суумма киирэн анал байыаннай дьайыыга сылдьар уолаттарбытын өйүүр тэрээһиннэргэ ананна. Уолаттар уонна кинилэр дьиэ-кэргэннэрин ааттарыттан бары көмөлөспүт дьоҥҥо сиргэ тиийэ бокулуон, барҕа махтал. Инникитин да бары бииргэ буолуоҕуҥ, сомоҕолоһон кыайыыны ситиһиэҕиҥ.
